Ajugaassangasup Bidenip USA-p Parisimi isumaqatigiissummut ilannguteqqinnissaa neriorsuutigigaa
USA-mi præsidentimut qinersinermi inernerit naalagaaffinni arlalinni suli amigaataapput.
Demokratit qinigassanngortitaat, Joe Biden, nutaarsiassaqartitsivik AP naapertorlugu qinersisartut sinnerlugit taasisartunik 264-inik pissarsisimavoq, Bidenili taasisartunik 253-inik pissarsisimasoq tv-qarfiup CNN-ip allaaseraa.
USA-mi præsidetinngorniaraanni taasisartunit 270-init taaneqarsimasariaqarpoq. Donald Trump nutaarsiassaqartitvik AP naapertorlugu taasisartunik 214-inik pissarsisimavoq.
USA-p silap pissusiata allanngoriartornerata akiorniarneqarnissaanut Parisimi isumaqatigiissummut ilannguteqqinnissaa sulissutiginiarlugu, Joe Bidenip qinigaassagaluaruni neriorsuutigaa.
Biden inoqatinut attaveqaammi Twitterimi sisamanngornermut unnuaani taama allappoq.
- USA Parisimi isumaqatigiissummit pisortatigoortumik ullumi ilaasortaajunnaarpoq. USA-llu Parisimi isumaqatigiissummut ullut 77-it qaangiuppata ilannguteqqinnissaa Bidenip naalakkersuisoqataasalu sulissutiginiarpaat, Joe Biden Twitterikkut allappoq.
AAMMA ATUARUK USA Parisimi isumaqatigiissummit pisortatigoortumik ilaasortaajunnaarpoq
Ullut 77-it qaangiuppata tassaassaaq januaarip ulluisa 20-at, USA-p præsidentiata nutaap pisortatigoortumik ivertinneqarfiata ullua.
USA Parisimi isumaqatigiissummit pingasunngornermi pisortatigoortumik ilaasortaajunnaarpoq, USA-p isumaqatigiissummit aninissaanut Donald Trumpip ukiup ataatsip matuma siornatigut nalunaarutigimmagu.
Trumpip isumaqatigiissut akerlerisorujussuuaa, isumaqatigiissummi USA-p aningaasarsiorneranut ajoqutaasutut isigaa, nunat allat USA-mut unammillersinnaassuseqarnerulernerannik malitseqartoq isumaqarami.
USA nunani siullersaallu Parisimi isumaqatigiissummit anivoq. Nunat tamalaat silap pissusia pillugu Parisimi 2015-imi ataatsimeersuarneranni nunanit tamangajannit atsioqatigiissutigineqarpoq.