Bussertitsisoq: Segboardertoq apungajappara

Segboardit aqqusinerni tamanut ammasuni inerteqqutaapput. Tamanna sapaatip akunnerata siuliani Nunatsinni Politiit tusagassiutinut nalunaaruteqarnerminni naqissuserpaat. 
Segboarderneq inerteqqutaasoq naqissuserneqarmat qisuariaatit assigiinngillat. Innuttaasut ilaasa sooq Segboardit inerteqqutaasariaqarnersut paasiuminaatsippaat . Ilaasali tunngavissaqarluarsoraat. 

Aamma atuaruk Segboardit inerteqqutaalersut

Ulorianartoq

Daniel Lynge Christophersenip Nuummi bussertitsisuunermini meeqqat inuusuttullu Segboardertut ullut tamaasa naammattoortarpai. Qanittukkullu ajorluinnartumik pisoqangajassimavoq. 
- Ulluinnarni pisuinnaat marseqqaanngiivillutik ikaariasaartarneri naliginnaavoq. Taamaammat mianersoqqissaartuaannarpunga. 
- Aqquserngulli sinaani Segboardertoqaraangat pisarnernit mianersornerusarpunga, taakkumi sukkanerugamik sangoriataassanersullu nalunartarluni. 

- Qanittukkut busserlunga nukappiaraq Segboartertoq aqqusinikkut ikaarfissaanngitsumi meterialunnguanik qanitsigaluni marseqqaanngiivilluni ikaariasaarpoq, Daniel Lynge Christopherseni, piffimmi tupassimaqisoq, KNR-imut oqaluttuarpoq. Qujanartumilli ajornerusumik pisoqarsimanngilaq. Tamarmik tuparujussuaannarsimapput.
Daniel Lynge Christophersenip ajornerusumik pisoqartinnagu Segboardit inerteqqutaanerisa naqissuserneqarnerat nuannaarutigaa.
- Biilit angallaffiini inerteqqutaaneri isumaqatigaara, bussertitsisoq oqarpoq. Taassuma Segboardit pisuinnaat aqqutaanni inerteqqutaaneri isummerfiginiarnngilaa.  

Meeqqat inuusuttullu atuisuusut

Politiit tusagassiutinut nalunaaruteqarnemminni inatsit ajutoortoqarsinnaanera pinngitsoorniarlugu inatsiseqartoq erseqqissarpaat. 
Biilinik ingerlatsisup segboardertoq pisuinnarmut paarlaattooraluarlugu naatsorsuutigisamit sukkanerusumik ingerlariataaraluarpat ajorluinnartumik kinguneqarsinnaasoq, Nunatta politiivini unnerluussissuutitaasoq Liselotte Bøhm nassuiaavoq.
Taassuma aamma Segbortertut meeraallutillu inuusuttuugajuttartut oqaatigaa.