Secret Service-ip angut præsidentip illorsuata eqqaani aallaagaa
USA-p præsidentia, Donald Trump ataasinngormat unnukkut illorsuarmini tusagassiortunik katersortitsinerani, isumannaallisaanermut suliaqartunit qimagutsinneqarpoq.
Trump naapertorlugu præsidentip illorsuata eqqaani isumannaallisaanermut suliaqartut Secret Service-meersut inummik aallaanninnerat tamatumunnga pissutaavoq.
Aallaaneqartoq sakkulisarsimasoq Trumpip aamma oqaatigaa.
Pasineqartoq taanna napparsimmavissualiaanneqarpoq, qanoq-issusaalu ilisimaneqanngilaq.
Sivikitsumik mattussisoqartoq
Trump USA-mi corona pillugu tusagssiortunut katersortitsinerminut sivitsunngitsoq uteqqippoq, sakkulersornerlu illorsuarmi eqqaani pisoq aqunneqalereersoq nalunaarutigalugu.
- Pakasarneqarpusi, uanga aamma pakasarneqarpunga. Tamanna qaqutigoorluinnarpoq, præsidenti oqarpoq.
Trump naapertorlugu isumannaallisaanermut suliaqartut, Secret Service-meersut illorsuup silataani pisoq suliariniarlugu præsidenti tusagassiortunut katersortitsisarfimmiit ingerlagallaqqusimavaat.
Secret Service USA-mi præsidentip ilaqutaasalu isumannaatsumiinnissaat suliarisarpaat.
Præsidentip illorsuani sivikitsumik mattussisoqarpoq.
Aningaasaqarnermut ministeri, Steven Mnuchin aamma missingersuusiornermut pisortaq, Russ Vought Secret Service-imit katersortitsivimmit qimagutsinneqarput, tamatumalu kingorna matut parnaarneqarlutik.
/ritzau/Reuters