Ataatsimiititaliaq: Uummannamiinneq misigisaqarfiulluarpoq
Illoqarfinni avinngarusimanerusuni pissutsit qanimut paasisassarsiorfigalugit Folketingimi ilaasortat aqqaneq-marluk angalaqqammerput.
- Uummannaq alutorisorujussuuara. Minnerunngitsumillu Saattuni innuttaasut sumiiffimmit taama mikitigisumeersuullutik sapiissuseqarnerat misigisamma annersarigunarpaat, Socialdemokratit sinnerlugit Folketingimi ilaasortaq Mogens Lykketoft taama oqarpoq.
Karin Gaardstedip, Socialdemokratineersup, Kalaallit Nunaat pillugu oqaaseqartartup angalanermini nunarput aamma misigisaqarluarfigaa. Avannaani aalisarnerup siuariarsimaneranit aningaasanik isaatitsillualersimaneq periarfissanik nutaanik nassataqarnerarpaa.
AAMMA ATUARUK Aleqap paasisat atorluarneqarnissaat neriuutigigaa
- Aningaasarsiorlualerneq inuiaqatigiinnut periarfissaqarnerulersitsivoq. Aningaasallu iluamik atorneqartariaqarput, soorlu meeqqat atuarfiata pitsaassusaata pitsanngorsaaviginissaanut, Kalaallit Nunaatami siunissarigaa isumaqarpunga.
Pinngortitaq sakkortusinnaasoq
Kalaallit Nunaata pinngortitarsuata kusanartup misigisaqarfigineranit aamma pinngortitap nukingata inuiaqatigiinnut qanoq kinguneqarsinnaanera paasisaqarfigaat. Tikeraammi Nuugaatsiami Illorsuarmilu tassaarsuaqarneranit eqqugaasut qanimut naapippaat.
- Ineqarniarnertik suliffeqarniarnertillu suli ajornartorsiutigaat. Suli sunnerneqaqqapput pigisatimmi tamaasa annaanikuuaat sulilu inissisimavimminnit aniguivissimanatik. Tamanna uannut takullugu sakkortuvoq, Enhedslisten sinnerlugu Folketingimi ilaasortaq Christian Juhl oqarpoq.
AAMMA ATUARUK Folketingip Nunarput pillugu ataatsimiititaliaaneersut nunatsinni paasisassarsiortut
Folketingimi ilaasortat paasinninnerusumik ataqqinninnerusumillu kalaallit atugaannut oqallinnermut angalanerminnit tunngavissaqalernissaat neriuutigalugu Folketingimi nunarput pillugu ataatsimiititaliap siulittaasuata Aleqa Hammondip KNR-imut oqaatigaa.