Scientific Fiels School Kangerlussuarmi
Ilinniartuni 21-usuni peqataasut aqqaneq marluk Nunatsinninngaanneerput. Nunatsinneersullu Aasiaat, Sisimiut, Qaqortullu ilinniarnertuunngorniarfianit peqataapput. Ilinniartut Nunatsinneersut tikeraallu ataatsimoorlutik soqutigisamikkut assigiissuteqarput. Ataatsimoorlutimmi pinngortitamik ilisimatusarnermut soqutigisaqarlutillu piginnaasaqarput.
Scientific Fiels School-imi atuartitsissutigineqartut pinngortitami ilisimatusarnermut tunngasuupput, tassalu uumassusilerineq, nunalerineq, fysikki kemiilu atuartitsissutaallutik.
-Ilinniartitsisuusugut immikkut tamatta piginnaasaqarnerput iluarisimaarnarpoq, Sermersioortarqarpugut,aammalu Kemiimik, nunalerinermik, uumassusilerinermillu ilisimatoortaqarluta. Taamaalillutalu ilinniartunut tamatta immikkut ilisimasanik ingerlatitseqqiisinnaalluarpugut, aasaanerani ilinniarfimmi aqutsisoq Kasper Busk oqaluttuarpoq.
Ilisimatuut sisamat sapaatip akunnerini marlunni ilinniartitsissapput. Ilinniartullumi aamma nammineerlutik pinngortitami ilisimatusarnerminni suliaqartinneqartassapput.
Kalaallinut peqataasunut atuartitsineq oqaatsinik piginnaasaqarnermut, pinngortitamilu ilisimatusarnermut soqutiginnilersitsissasoq qularnanngilaq. Peqataasullumi takusinnaalissavaat nunani allani qanoq atuartitseriaaseqartoqartartoq, tamannalu nunani allanut atuariartortussanut pitsaalluinnaassaaq.
-Suliniut kalaallisut ingerlassinnaagaluarparput, taamatulli aaqqissuussinermi neriuutigaara inuusuttut peqataasut nunani allami ilinniagaqarsinnaanermut soqutiginnilerumaartut. Inuiaqatigiinnguusugummi nunani allani aamma ilinniarsimasunik pisariaqartitsivugut,taamaalilluta siammasissumik ilinniagaqartut nunatsinni pigilersinnaagatsigit, Ilinniartitaanermut Naalakkersuisoq Palle Christiansen oqarpoq.
Pinngortitami ilisimatusarnermi ilinniarsimasut nunatsinni amigaataapput. Siunissamilu pinngortitamut ilisimatusarnermut tunngasunik ilinniarsimasut inuussutissarsiornermi inuiaqatigiinnullu iluaqutaassaqaat.
Scientific Fiels School Julip 12-iani naammassissaaq.
