Saviminikunik misileraalluni nassiussisoqartalissaaq

Containerit marluk saviminikunik ulikkaartut Sisimiuniit Danmarkimut umiarsuarmik sapaatip akunnerani uani nassiunneqassapput. Sinerissami eqqaavissuarni saviminikorpassuit piiarneqarniarnerannik suliami containerit taakku nassiunneqartut siullersaraat.

Misiliutitut suliniut taanna Sisimiuni Maniitsumilu taamaallaat ingerlanneqarpoq, siunissamilu nunarput tamakkerlugu ingerlanneqalernissaa takorluugaasoq, suliniummut aqutsisuusoq Zenica Gosvig Larsen KANUKOKA-meersoq oqarpoq.

Sisimiuni Maniitsumilu misilittagarilikkat katersorneqassapput, taamaalilluni ataqatigiissaarinikkut allatigullu atorneqarsinnaalerniassammata. Ilisimalikkallu taakku nalunaarusiarineqareerpata KANUKOKA-p nittartagaatigut kikkunnut tamanut kommuninullu ingerlateqqinneqassapput. Misilittagarilikkallu atorlugit aaqqissuussinerup uuma assinganik kommunit allat aallartitsisinnaanerat neriunarpoq, taamaalilluni Sisimiuni Maniitsumiliu aallartinnermi kukkussutaasarsimasinnaasut pinngitsoortinniarneqarsinnaassallutik. Aallartisarnermi taama nassiussisarneq imminut akilersinnaanersoq paasineqassappat, containerit qanoq immerneqartarnissaat qanorlu annertutigisumik imaqartinneqartarnissaat misiligarneqartartussaavoq. Misilittagarilikkallu kommuninut ingerlateqqinneqarnissaat neriuutigineqarpoq.

Saviminikut Danmarkimut tunineqarsinnaammata sinneqartoortarnissaq aallaqqaataanit takorloorneqarsimavoq, tamannali Danmarkimi saviminikut maannakkut akikinnerujussuat patsisigalugu piviusorsiortuunngitsoq paasinarsinikuuvoq, taamaammat umiarsuakkut nassiunneqarnerat taamaallaat matussuserneqarsinnaassasoq neriuutaavoq.

Misiliinermik suliniut aappaagu aasarnissaata tungaanut ingerlanneqassaaq, ilisimalikkallu qanoq atorneqarnissaat kommunit namminneq aalajangissavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat