Savalimmiut EU-mut qanillattorniarput
Savalimmiormiut Lagmandiat, Kaj Leo Holm Johannesen, Politikenimut ullumi taama oqarpoq. Taamaaliornikkummi Savalimmiormiut nioqqutissanik sulisussanillu niueruteqarnissaannut pitsaanerusunik periarfissaqalersinnaasorigamiuk.
Lagmandip EU-mut attaveqarnera, ammassassuarnik pisassiissutit pissutigalugit, qaammatini arlalinni kingullerni ilungersunarluinnartuusimavoq, EU-Kommissionillumi Savalimmiut niuernikkut killilersuiffigineqarnissaat sapaatit akunnera kingulleq akuersissutigigalugu.
Kaj Leo Holm Johannesenili piffissami ungasinngitsumi ajunnginnerusumut saattoqarnissaa neriuutigaa.
- Ammassassuarnik pisassiissutit pillugit ajornartorsiut iluarsineqariarpat, EU-mut nutaamik isumaqatigiissuteqarnissarput ingerlaannaq isumaqatigiinniutigissavarput, Politikenimut oqarpoq.
Savalimmiormiut ammassassuarnik pisassiissutit saqitsaassutaanerisa isumaqatiginninniarnikkut aaqqinniarnissaat sulissutiginiarpaat, taamaasillutillu aamma killilersuiniarnerit EU-p sapaatit akunnera kingulleq akuersissutigisai pinngitsoortillugit, taakkumi Savalimmiuni akerliuffigineqangaatsiarput.
Kaj Leo Holm Johannesen naapertorlugu suliaq ministeriunermut Helle Thorning-Schmidtimut apuunneqarluni oqaloqatigiissutigineqarsimavoq, lagmandillu oqarneratut taassuma "isumassarsiatsialattut isigaa".
EU-mi pissutsit pillugit professorip, Marlene Windip, Savalimmiut EU-mut qaninnerulernissamik kissaateqarnerat pissusissamisoorsoraa. Savalimmiulli taamatut suliniuteqarnissaminnut piffissaq toqqarsimasaat aamma eqqumiigivaa.
- EU-mut saqitsaassuteqarsinnarluni, kinguninnguaaEU-p iluani niuerfimmut ilanngukkusulernerat ippinnalaarpoq, Marlene Wind Politikenimut oqarpoq.