Savalimmiuni Visakortit Dankortillu tuusintit sinnillit matutinneqartariaqarsimapput

Nittartakkami Computerworldimi tamanna oqaluttuarineqarpoq.

Savalimmiuni pisiniarfiit ilaata qarasaasiaanut ilungersunartumik unioqqutitsilluni pulasoqarsimanissaa pasitsaanneqarpoq, pisiniarfilli sorliunersoq aamma qarasaasiakkut pisiniartarfiunersoq pisiniarfilluunniit nalinginnaanersoq suli paasissutissiissutigineqanngilaq.

- Misissueqqissaarnerput patsisigalugu annerusumik paasissutissiisinnaanngilagut. Isumannaatsuunissarli pissutigalugu Savalimmiuni kortit aningaasanik tigusissutit tuusintit sinnillit matoorarpavut taarsersorlugillu. Atuisut kortitik Savalimmiuni sullissisuminnit taarsertissinnaavaat, Søren Winge Nets-imeersoq Ritzauimut oqarpoq.

Savalimmiuni najugallit inuit 50.000-it missaanniimmata, Savalimmiuni pissutsit eqqarsaatigalugit kortit taarsersorneqartut amerlasoorujussuusut, Søren Wingep oqaatigaa.

Nets-imi kortinik akiliissutinik Nunani avannarlerni isumaginnittuusumi taama misigisaqartoqartarnera qaqutigoortuuvoq, assersuutigalugu Danmarkimi ukiuni kingullerni sisamani tallimani taama misigisaqartoqarsimanngilaq.

- Pisut tamakkua annerusumik oqaluttuarineq ajoraluarpavut. Nunanili avannarlerni ukiuni kingullerpaani tamatumunnga assingusumik nalaattaqarsimanngilagut. Tassa taamaalilluta kortinik taama amerlatigisunik taarsersuisariaqarnerput qaqutigoortuuvoq, Søren Winge oqarpoq.

Aningaasanik akiliissutit taarsersorneqartut atornerlunneqareersimanersut aningaasanik akiliissutinik isumaginniffiup oqaatigisinnaanngilaa.