Savalimmiuni qinersinermi talerperliit ajugaasuupput
Savalimmiuni namminersorneruneq 1948-mi eqqunneqarmalli, lagmanditut issiareersoq partialu ilaasortaatitatigut qinersisitigullu pernaammik siuariartuupput.
Partit pingasut talerperliuniartuusut, Danmarkimik suleqateqarnissamik akuersaartuusut, qinersinermi ajugaasuupput. Sambandsflokkurinip saniatigut matumani pineqarlutik konservativiusut Fólkaflokkurin konservativinillu avissaartut Framsókn.
Partit angisuut taakku marluk ilaasortaatitamikkut ataatsimik siuariarlutik lagtingimi tamarmik immikkut arfineq pingasunik ilaasortaatitaqalerput. Fólkaflokkurin-imit avissaartut partiat Framsókn, siullermeerluni qinigassanngortitsisoq, marlunnik ilaasortaatitaqalerpoq.
Lagtingimut ilaasortassanik 33-usunik ilungersuuteqarnermi, ajorsartut tassaapput republikanerit partiat Tjódveldi. Parti taanna folketingimi Atlantikup Avannaani Suleqatigiinni siuttutut ilaasortaatitaqaraluartoq, arfineq pingasuniit marlunnik ikileriarlutik, arfinilinnik ilaasortaatitaqalerput.
Partit naalakkersuisuutitaqartut aappaat, Savalimmiuni Socialdemokratit, imminnut Javnardarflokkurin-imik taagortut ilaasortaatitaat allannguuteqaratik arfiniliuinnarput. Ilaasortanngortunili arfiniliusuni tallimat nutaamik qinigaapput.
Partit minnerit marluk Sjálvstyrisflokkurin aamma kristumiut Midflokkurin tamarmik atatsimik ikileriarlutik aappaa ataasiinnarmik aappaalu marlunnik ilaasortaatitaqalerput.
Savalimmiuni lagtingimut ilaasortanngortuni qulit arnaapput, taamalu ilaasortat 33-usut pingajorarterutingajalluinnaat arnaallutik.
Savalimmiuni kikkut naalakkersuisunngortitsissanersut suli nalunarallarpoq. Qinersineq sioqqullugu Kaj Leo Holm Johannesen, Sambandsflókkurinip aamma Javnadarflokkurinip suleqatigiinnerisigut, naalakkersuisoqatigiinni ikinnerussuteqartuni siulittaasuuvoq.
