Savalimmiuni politikerit qullersat ilaat peqquserluttut
Taama isumaqarpoq siornatigut siulersuisuni ilaasortaasimasoq Suni á Dalbø, taassumalu ministeri akisussaasuusoq Savalimmiuni inuussutissarsiornermut ministeri Johan Dahl aamma naalakkersuisut siulittaasuat Kaj Leo Holm Johannesen politiit misissueqqissaartartuinut unnerluutigisimavai. Tamanna aviisip Ekstra Bladep allaaseraa.
- Aningaasaateqarfiup atuunnera inuinnaat naalakkersueqataanerannut aamma inuiannut inuit inatsisitigut illersugaanerannik pingaartitsisunut naapertuutinngilaq, Afrikami kisermaassillutik naalakkersuinermik ingerlatsisunut eqqaanarneruvoq, Suni á Dalbø oqarpoq.
Taassuma 2009-mi juunimili aningaasaateqarfiup suliassaminik ingerlatsinera ajorluinnartoq maluginiarpaa, tassa matumani pineqartillugit suliassat immikkuualuttortaasa nigorsimanissaannik isuma aamma suliamut attuumassuteqarpallaannginnissamut tunngasut pineqartillugit.
- Aningaasat amerlasuut 250.000 koruunit aamma 500.000 koruuninik amerlassusillit ikinngutinut tunniunneqartarsimasut, unnerluutiginnissummi ilaatigut oqaatigineqarpoq. Inuussutissarsiutinik siuarsaanissamut aningaasaateqarfiup ukiuni 2004-mit 2009-mut 36 millionit koruunit sinnillit agguaassimavai.
Aningaasaateqarfiup pisortat aningaasaataannut akisussaasup, qanoq ililluni soorlu oqaatigisamisut 'ilaquttat festernissaannut' atorneqartarsimanerat, Suni á Dalbøp mamiasuutigaa.
Taassuma inuussutissarsiornermut ministeri Johan Dahl 2009-mili nassuiaaqqusarsimagaluarpaa, soorlu aamma naalakkersuisut siulittaasuat Kaj Leo Holm Johannesen pineqartumut ilisimasaqaraluarluni qisuariartarsimanngitsoq.