Savalimmiuni nutaarsiassaqartitsivik immiussamik isertortumik saqqummersitseqqusaanngitsoq: - Nalorningaatsiarpunga
Immiussaq Savalimmiuni naalakkersuisut siulittaasuata Bárdur Nielsenip Kinamiullu Danmarkimi aallartitaata Feng Tie-ip ataatsimiinnerisa imarisaanik ersersitsisoq suliarujussuanngorpoq.
Nipi immiunneqartoq savalimmiormiut nutaarsiassaqartitsiviannit Kringvarpimit immiunneqarpoq – nutaarsiassaqartitsiviulli immiussaq saqqummiuteqqusaanngilaq. Savalimmiunimi naalakkersuisut eqqartuussisumit inerteqquteqartitsipput.
Savalimmiuni naalakkersuisut isertortumik ataatsimiinnermit immiussap tamanut saqqummiunneqannginnissaa pissutigalugu eqqartuussisumit inerteqquteqartitsinissamut aggeqqussuteqarnissamik ataasinngornermi tunniussaqarput.
Berlingske taama allaaserisaqarpoq.
Tamanna Savalimmiut 5G-mut attaveqaateqalernissaannut kinamiut suliffeqarfissuat, Huawei suliarinnittuussaneranut aalajangiisussanngornerani pivoq.
Immiussamik saqqummersitsinissamut 22 minutsiinnanngortoq inerteqquteqartut
Suliaq sapaatip akunnerata ataatsip matuma siorna aallarnerneqarpoq, tassa Kringvarpip immiussamik tv-aviisikkut saqqummersitsinissaanut 22 minutsiinnanngortoq eqqartuussisumit inerteqqut takkuppoq. Nipi immiussaq Savalimmiuni naalakkersuisut siulittaasuata kinamiullu aallartitaata novembarip 11-anni ataatsimiinneranni immiussaavoq.
Inerteqquteqarneq Kringvarpip maannamut ataqqigaluarpaa, Kringvarpimili nutaarsiassaqartitsinermut pisortap, Georg L. Petersenip inerteqqut qatangiinnarlugu saqqummersitsinissaq isumaliutersuutigaa. Tamanna DR-ip aallakaatittagaanut P1 Morgenimut oqaatigaa.
AAMMA ATUARUK Savalimmiormiut Huaweimut oqallisaangaatsiartumut qaninniartut
- Savalimmiuni innuttaasunut kiffartuussinissamik isumaqatigiissuteqartutut nunamilu inatsisinik ataqqinnittussaalluta inatsisit unioqqutissavagut, imaluunniit ataqqiinnassavagut? Tusagassiortutullu paasissutissanik Savalimmiuni innuttaasunut pingaaruteqarsinnaasunik tamanut soqutiginaateqarluinnartunik tigumminninnermi isummat periaatsinut tunngaviusunut tamanut unioqqutitsipput. Nalorningaatsiarpunga, Georg L. Petersen P1 Morgenimut oqarpoq.
Huawei aamma niuerneq
Oqaloqatigiinnerit Huawei-ip Savalimmiuni 5G-mut ataaveqaatinik tunisassiortunngorsinnaaneranut aamma Kinap Savalimmiullu akornanni niuernermut attaveqaatinut tunngasut immiussat saqqummersinngikkaluarlugit tamanna Kringvarpip uppernarsarpaa.
Eqqartuussisumit inerteqquteqarneq pissutigalugu nutaarsiassaqartitsinermut pisortap immiussami suut immiunneqarsimanersut oqaluttuareqqusaanngilaa, kisianni:
- Sooq ulorianarnersoq oqaatigeqqusaanngilara – kisianni Kinamut niuernerput annertoorujussuuvoq. Ukiumut 600 millionit koruunit nalinganuugunarput avammut tunisaqartarpugut, tamannalu Savalimmiunut ataqatigiilluni, Georg L. Petersen oqarpoq.
- Aamma killilersugaanngitsumik nieqatiginninniarsarigaluarpugut. Tamanna Kinamut niueqatigiilluarnissamut pingaartorujussuuvoq, nutaarsiassaqartitsinermut pisortaq oqarpoq.
