Savalimmiormiut Huaweimut oqallisaangaatsiartumut qaninniartut

Kinamiut oqarasuaatinut tunngatillugu suliffeqarfiutaat, Huawei, savalimmiormiut naalakkersuisuinik Savalimmiuni 5G-mut attavimmik pilersitsinissaq pillugu ataatsimeeqatiginnippoq.

Kinamiut suliffeqarfiutaat Huawei 5G-mut attavinnik nutaanik sukkasoorujussuarnillu neqerooruteqarsinnaasuni suarsimanerit ilagaat. Huaweili kinamiut naalagaaffiannit kimiiserfigineqarluni, 5G-mut attavik isertortumik paasiniaanermut atuisorineqarpoq, taamaammat suliffeqarfiit nunarsuarmiittut amerlasuut Huawei toqqarnagu neqerooruteqartut allat toqqortarpaat. TV2.dk taama allaaserisaqarpoq.

AAMMA ATUARUK Norgemi isertortumik paasiniaasartut paasisaat Nunatsinni ernumassutissaanngillat

Taamaakkaluartorli savalimmiormiut naalakkersuisui kinamiut suliffeqarfiutaannik Savalimmiuni 5G-mut attavimmik pilersitsinissamut ataatsimeeqatiginnilerput.

Tamannalu amerikamiut Danmarkimi aallartitaannit Carla Sandsimit ilaatigut akerlilerneqarpoq:

- Savalimmiormiut kalaallillu Huawei-imik suleqatiginninniarlutik aalajannginnginnerminni eqqarsarluaqqaartariaqarput, Carla Sands danskit aviisiannut Berlingskemut allappoq.

Nutaarsiassaqartitsivik paasissutissiinissamut inerteqquteqarfiusoq

Savalimmiormiut nutaarsiassaqartitsiviata, Kringvarp Føroyapip allaaserisaa naapertorlugu Savalimmiormiut attaveqaatit pillugit suliffeqarfiutaa, Føroya Tele 5G-mik attavinnik pilersitsinissamut Huawei-imut oqaloqatigiissuteqartuuvoq.

Savalimmiormiullu niuernermut ministeriata, Helgi Abrahamsenip amerikamiut aallartitaata oqaaseqarnera naalagaaffimmi sillmaniarnermut tunnganersoq niuernermulluunniit tunnganersoq qularutigigaa, Kringvarp allappoq.

- Huawei ilumut isertortumik paasiniaanermik suliaqarnersoq paasineqarnikuunngilaq. Illuatungaanilu kinamiut inatsit, suliffeqarfinnut isertortumik paasiniaatitsisoqartitsisinnaasoq akuerinikuugaat aamma nalunngilarput. Tamanna soorunami ernumanartortaqarpoq, suliarlu malinnaaffigilluaqqissaarparput, Helgi Abrahamsen oqarpoq.

AAMMA ATUARUK Huawei risikerer at blive udelukket fra tysk mobiludbygning

Huawei-ip savalimmiormiullu akornanni naapinnermut paasissutissat savalimmiormiut nutaarsiassaqartitsiviannit, Kringvarp Føroyamit paasissutissiissutigineqaqqusaanngimmata suliaq Savalimmiuni oqallisaangaatsialerpoq.

- Kinamiut Danmarkimi aallartitaqarfia ataatsimiinnissamik suliniuteqartuusoq paasineqarpoq, savalimmiormiullu niuernermut ministereqarfiata nalunaaruteqaqqusinnginnissaq piumasaralugu, Kringvarp allappoq.

Huawei nunatsinni maani attaveqaatinut atatillugu aamma ilisimaneqarpoq. Suliffeqarfik imaatigut kabelip tallineqarnissaanut ilaatigut peqataavoq.