Nunanit allanit

Savalimmiut naalakkersuisui Suðuroyimoortumik sullorsualiortitsilersaartut

Savalimmiut naalakkersuisui qeqertat avannarlerniit qeqertamut kujallerpaamut, tassa Suðuroyimoortumik sullorsualiortitsilersaarput. Taamaaliornissamulli ilumut akissaqarnersut qularnartoq, aningaasaqarnermut siunnersuisoqatigiivi naliliipput.
Savalimmiut qeqertaasa kujallersaat, tassa Suðuroy, sullorsuarmik qeqertat sinnerinut atassuserneqassasoq, lagmandiata Bárður á Steig Nielsenip nalunaarutigereernikuuaa. Assi © : DavideGorla/flickr
Allattoq Helle Nørrelund Sørensen
septembarip 08-at 2022 11:26
Nutserisoq Hanne Petersen

Savalimmiut naalakkersuisui piumasaat piviusunngussappat qeqertaasa kujallersaat, tassa Suðuroy, sullorsuarmik qeqertat sinnerinut atassuserneqassaaq.

Sullorsuaq nutaaq Eysteroyimiit Sanðoyikkut Suðuroyimut ingerlavissanngussaaq.

Taamaattoqassappallu ilumut akissaqartinneqarnersoq qularnaqisoq, Savalimmiut aningaasaqarnermut siunnersuisoqatigiivi erseqqissarpaat.

Nittartakkakkut nutaarsiassaqartitsivik Altinget Arktis taama allappoq.

Savalimmiut naalakkersuisui sullorsualiortitsinissamut ukiumut 100 millionit koruuninik 2025-miit illikartitsisalersussamik piginneqatigiiffiliorniartut, lagmandiat Lagtingip inuiattut juulip 29-ani ullorsiorfimmi ammaanersiornerani oqalugiarami oqarpoq.

Savalimmiuni ingeniøriinerup Suðuroyimoortumik sullorsualiortitsineq 5,4 milliardit koruunit missaannik akeqassangatikkaa, Altinget Arktis allappoq.

AAMMA ATUARUK Ukiut pingasut qaangiuppata Nuummi illoqarfiup ilassaanut sullorsuakkoortoqarsinnaalissasoq

800 millionit koruuninik ileqqaagalereersimaleriarunik sullorsualiortitsisinnaanngussasut, Savalimmiut aningaasaqarnermut siunnersuisoqatigiivisa nalilerpaat. Aningaasalli taakku 5,4 milliardit koruuninut matussutissatut naammaqqajanngillat.

Sullorsuakkornermilu akiliutit sanaartornermi aningaasartuutaasussat 10 procentiisa 20 procentiisalu missaannaannut matussutaajumaartut, aningaasaqarnermut siunnersuisoqatigiit erseqqissaapput.

Taamaammat Savalimmiut naalakkersuisui sullorsualiortitsissagunik tamatumani aningaasartuutit amerlanerpaartaat taarsigassarsiaqangaatsiarnikkut namminneq akilertussaassavaat, massakkorpiarlu taarsigassarsineq akisuvoq.

- Sanaartugassat allat inuiaqatigiinni pisariaqartilluinnakkavut aamma sanaartorneqassappata, nunatsinni aningaasarsiornikkut ingerlalluartoqaraluartoq suliffissaaleqisoqanngingajavikkaluartorlu aningaasanut inatsit sinneqartoorfiunngimmat, Suðuroyimut sullorsualiornissaq piviusorsiunngilaq, Savalimmiut aningaasaqarnermut siunnersuisoqatigiivi ilisimatitsisut Altinget Arktis allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk