Ukiut pingasut qaangiuppata Nuummi illoqarfiup ilassaanut sullorsuakkoortoqarsinnaalissasoq
Kommuneqarfik Sermersuup anguniakkani marluk anguniarlugit sullorsualiornissat marluk suliarinnittussarsiuunniarpai.
Illoqarfiit pingaarnersaannut iliuusissiaq naapertorlugu Nuummi innuttaasut 30.000-it 2030-mi inissaqartinneqassapput, taamaammat innuttaasut siunissami qaninnerusumi nuuttutssat Nuummi inissaqartinnissaannut illoqarfik nutaamik ilaneqartariaqarpoq.
AAMMA ATUARUK Siorarsiorfimmut tunngatillugu 2019-imi sanaartortoqalissaaq
Illoqarfiup ilaa Nuup sinneranut sullorsuakkut atassuserneqassaaq. Pilersaarut malillugu aqqut siulleq Kangerluarsunnguamut aqqutaassaaq.
Assi: Ukkusissap innaarsua sinerlugu sullorsuaqassaaq.
Sullorsualiornissaq suliarinnittussarsiuunneqangajalersoq kommune allappoq:
- Kommunitsinni eqqortumik ingerlanissatsinnut alloriarneruvoq angisooq. Nuummi inissialiornissanut inuussutissarsiutillu sumiiffissaannut nunaminertat amigaatigineqarput. Siorarsiorfiup tungaanut sullorsualiornissaq suliffeqarfinnik amerlanerusunik inuillu amerlanerusut initaarnissaannik kinguneqassaaq, Kommuneqarfik Sermersuumi borgmesteri, Charlotte Ludvigsen (IA) oqarpoq.
Kommunip pilersaarutaa naapertorlugu sullorsuaq kilometerimik takissuseqassaaq 1500 meterinillu takissuseqartumik aqqusineqassalluni.
Siorarsiorfimmut sullorsualiornerup sanaartorneqarnera ukiaru aallartinneqassasoq, Nuummilu innuttaasut sullorsuaq ukiut pingasut qaangiuppata atorsinnaalissagaat naatsorsuutigineqarpoq.
Aalajangiineq maajip ulluisa 19-ianni marlunngornermi immikkut ittumik ataatsimiinnermi aalajangerneqarpoq.
Nuummi sullorsuup tallineqarnissaa
Kommunip sullorsuarmut allamut suliassaq alla ilanngunniarlugu ullormi tassani aamma aalajangerpaa.
Tassa Nuup Nuussuullu akornanni sullorsuaq marlunnut sammivilerneqarluni allilerneqassaaq.
- Sullorsuarnik marlunnik suliaqarnissap ataatsimoortinneratigut kommune annertuumik sipaaruteqarnissaa naatsorsuutigineqarpoq, taamaaliornikkummi atortussat pisariaqartut Nuummut tikisinneqartussat ataatsikkut tikisinneqarsinnaassapput, soorlu aamma sulisut pisariaqartinneqartussat ataatsimooreersimassasut, kommune allappoq.
AAMMA ATUARUK Sermersuup Siorarsiorfimmi suliniummut naleqqussaanissani piareersimaffigigaa
Nuup Nuussuullu akornanni sullorsuaq illuinnaanit maanna ingerlavigineqarsinnaavoq.