Savalimmiuni tunillatsissimasut 47-sut: Politiit killeqarfinni nakkutilliisalertut
Savalimmiuni inuit coronavirusimik tunillatsissimasut 47-nngorput.
Savalimmiuni nakorsaaneq Lars Fodgaard Møller Savalimmiuni naalaakkersuisut coronavirus pillugu nittartagaanni taama ilisimatitsivoq.
Tunillatsissimasut ataasinngornermi 18-iusut marloriaat sinnerlugu amerleriarsimapput. Savalimmiuni inuit 247-t angerlarsimaannaqqusaapput, 703-llu coronavirusimik tunillatsissimanermik misissorneqarsimallutik.
Politiit killeqarfinni nakkutilliisalertut
Savalimmiuni politiit Danmarkimi politiit assigalugit killeqarfinni marlunngornermi nakkutilliisalerallartut, Savalimmiuni politiit tusagassiuutinut taama allapput.
AAMMA ATUARUK Coronavirusimik Savalimmiuni tunillatsissimasut 18-iusut
Savalimmiunut tikittut Savalimmiuni najugalittut sulisutulluunniit uppernarsaateqanngitsut peqquteqavinngitsumilluunniit angalasut Savalimmiunut iseqqusaanngillat. Tamanna nunatsinnut tikittunut aamma atuuppoq. Nunatsinnut peqquteqavinngitsumik tikittut nunatsinnut aamma iseqqusaanngillat. Nunatsinnili Danmarkimilu innuttaassusillit suli nunatsinnukaqqusaallutik.
Soorlu nioqqutissanik Savalimmiunut tassanngaanniilluunniit imaluunniit nunatsinnut nunatsinniilluunniit tikiussisut, ilaquttaminnut peruluttumut orniguttut meerarsiaminnilluunniit isumaginnikkiartortut peqquteqavissumik angalasutut isigineqarput.
Timmisartuutileqatigiiffiit timmisartuussisarunnaarallartut
Killeqarfinni nakkutilliisoqanngikkaluarpalluunniit Savalimmiunut angalanissamut periarfissat ikipput.
Coronavirus oqartussaasullu killilersuinerat pissutaallutik timmisartorluni angalasoqarpiarunnaarmat, timmisartuutileqatigiiffiup SAS-ip nunanut tamalaanut timmisartuussinerminik tamangajannik taamaatitsigallarnini nalunaarutiginikuuaa.
AAMMA ATUARUK Naalakkersuisut Danmarkimut timmisartortarneq suli unitsinnianngilaat
SAS Savalimmiut Danmarkillu akornanni aqagu pingasunngornermiit killiligaanngitsumik timmisartuussisarunnaarallassasoq, nittartakkakkut nutaarsiassaqartitsivik local.fo allappoq.
Savalimmiuni timmisartuutileqatigiiffik Atlantic Airways Savalimmiunut tassanngaanniillu timmisartuussinermik apriilip ulluisa 13-iata tungaanut killileerujussuarpoq.
Epidemikommission fraråder alle unødvendige rejser
Timmisartuutileqatigiiffiulli napparsimasunik inunnillu Savalimmiut avataanni sulisunik timmisartuussisarnini attatiinnarpaa.
Coronavirusumik tunillatsissimasutut nunatsinni paasineqartuni siullerpaaq ataasinngormat nalunaarutigineqarpoq. Taamaakkaluartoq naalakkersuisut nunatsinnut nunatsinniillu Atlantiku qulaallugu timmisartuussinermut tunngatillugu suli killilersuinngillat.
Kisianni tunillaassortunik nappaalasoqarneranut ataatsimiititaliarsuup nunatsinni nunanullu tamalaanut timmisartuussinerit pisariaqavinngitsut tamarmik sakkortuumik inerteqqutigai.
