Coronavirusimik Savalimmiuni tunillatsissimasut 18-iusut
Coronavirusimik Savalimmiuni tunillatsissimasut maanna 18-iupput.
Savalimmiuni nakorsaaneq coronavirus pillugu savalimmiut naalakkersuisuisa nittartagaanni taama allappoq.
Tunillatsissimasut ippassarmit arfineq-marlunnik amerleriarput. Savalimmiuni inuit angerlarsimaannaqqusaasut katillugit 247-pput, coronavirusimillu tunillatsissimanermik misissorneqarsimasut 517-iullutik.
Damarkimi periuseq nutarterneqartoq
Danmarkimi oqartussaasut nutaamik periuseqalissallutik sapaatip akunnerani kingullermi pingasunngornermi aalajangerput. Inunnik coronavirusimik tunillatsissimanermik qaqugukkut misissuisoqartassanersoq, nakorsat immikkut ilinniarsimasut aalajangertalertussanngorpaat. Inuillu coronaviruseqarnermik ersiutillit taamaallaat misissorneqartassapput.
Taamaattumik Danmarkimi tunillatsissimasut amerlassusaat pillugit paasissutissat tutsuiginarunnaarput.
Danmarkimi inuit tamarmik tunillatsissimasutut isigineqartariaqarput. Taamaammat inuit napparsimasutut misiginngikkaluarpataluunniit oqartussaasut inunnut qanillattornaveersaarnissamut, talermut tangajornissamut quersornissamullu aammalu errortukulanissamut inassutaannik malinnissapput.
