Naalakkersuisut Danmarkimut timmisartortarneq suli unitsinnianngilaat
Danmarkimi februaarip 27-anni coronavirusimik tunillatsittoqaqqaarneraniilli tunillatsissimasut 914-inut amerlipput.
Naak tunillatsissimasut amerliartuinnaraluartut Naalakkersuisut siulittaasuata, Kim Kielsenip Danmarkimit timmisartorsuarmik tikikkartut suli matunianngilai.
- Nunatsinni avammut suli attaveqarnissarput pingaaruteqarpoq. Nunatsinni misissuinermik tigusat nassiunnissaat peqqinnissaqarfimmiillu Danmarkimut peqqissariartortut aallarsinnaanissaannik tamanna qulakkeerissasoq, Kim Kielsen tusagassiortunik katersortitsinermi oqarpoq.
AAMMA ATUARUK Illuatungiliuttut: Coronamik tuniluuttoqaqqunagu nunarput matuli
Kisianni Tunillaassortunik nappaalasoqarneranut ataatsimiititaliarsuup nunatta iluani nunanullu tamalaanut timmisartuussinerit pisariaqavinngitsut arlaannaalluunniit inassutiginngilai.
Inunnut avataaneersunut mattussineq
Coronavirus nunatsinnut marsip ulluisa 16-ianni annguppoq. Avataaniit tikittut tamarmik ulluni 14-ini angerlarsimaffinnit aneqqusaannginnissaat, Naalakkersuisut sukaterissutigisaanni kisimiippoq.
- Tamanna tuniluuttoqalernissaanik pinaveersaartitsiniarneruvoq. Eqimattanilli immikkut ittumik atuuffeqartussanik tikittoqartassaaq. Eqimattat taakku suliartornissaminnut immikkut ittumik akuersissuteqarfigineqassapput, nakorsaaneq, Henrik L. Hansen oqarpoq.
Danmarkimiilli timmisartuussisoqaannarneratigut Tunillaassortunik nappaalasoqarneranut ataatsimiititaliarsuup innersuussutaasa ilaat malinneqarsinnaanavianngitsut nakorsaanerup nassuerutigaa.
- Ingerlalluarnerpaatitsiniarnermi naapeqatigiinnernik sanasoqartariaqarpoq. Mittarfinni piffissani sivitsuni inuit amerlavaalaartarnissaat ilisimavarput, ajunnginnerpaamilli ingerlasoqarnissaa pillugu tamanna akuerisariaqarparput, nakorsaaneq, Henrik L. Hansen oqarpoq.
AAMMA ATUARUK Tamaat isigalugu: Coronavirus pillugu killiffik
Timmisartut, qulimiguullit umiarsuillu inissat tamaasa atorlugit suli angallassisinnaapput Air Greenlandip Københavnimiit Kangerlussuarmut timmisartuussineranut tamanna aamma atuuppoq.
Ilaasartulli nalinginnaasumit ikinnerulingaatsiartut Kim Kielsenip oqaatigaa. Nunatsinni tuniluutilertoqaqqunagu qanoq suliniuteqartoqalernissaa Naalakkersuisut ingerlaavartumik nalilersorpaat.
Tunillaassortunik nappaalasoqarneranut ataatsimiititaliarsuup innersuussutigaa:
- aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
- nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq.
- illoqarfinni bussit ilaasunik ulikkaaveqqusaanngillat.
- timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat.
- inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.
- inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.
