Savalimmiuneersut folketingimi ilaasortat aalassassimaarput

Danmarkimi nunanut allanut ministerip Savalimmiuni arfanniarneq killilersorniarpaa.

Nunanut allanut ministeri Lene Espersen Savalimmiormiut akornanni nuannarineqarpallaarunnaarpoq, Savalimmiormiut arfattassaat - arferit annerit - ukiuni qulini tullerni killilersorniarlugit nalunaareersorlu.

Savalimmiormiut angisuunik arfanniarnissamik kissaataannik killilersuiniarneq nunarsuatsinni arfanniartarnermik aalajangersaanissami siunnersuummi ilaatinneqarpoq. Arferit pineqartut tassaapput Savalimmiormiut niisarnartarisartagaannit annerusut.

Savalimmiuni partiip saamerliunerusup Republikanerit folketingimi lagtinngimilu ilaasortaatitaat Høgni Hoydal isumaqarpoq nunanut allanut ministeri "pingaakujunniarpallaarujussuartoq."

- Immaqa uagut inuiattut nalusimavarput Savalimmiormiunut suna pitsaanerunersoq, Høgni Hoydal oqarpoq.

Hoydal isumaqarpoq, arfanniarneq pillugu ataatsimiititaliarsuarmi IWC-mi Savalimmiut ilaasortaaginnassanerlutik naliliiffigisariaqaraat. Ataatsimiititaliarsuarmimi ilaasortat arfanniarnermik killilersuinissamut siunnersuut ungasinngitsukkut oqaluuserissavaat.

- Akueriuminaatseqaarput, Danmarkimi oqartussat aalajangiussatik nunarsuup sinneranit aallartitanut Savalimmiut soqutigisaattut saqqummiutissammatigit. Isumaqarpugummi siunnersuutigineqartut Savalimmiormiut soqutigisaanik uniuisuusut, Hoydal Ritzauimut oqarpoq.

Aamma Savalimmiut sinnerlugit folketingimi ilaasortap aappaa Edmund Joensen, Sambandspartiet-meersoq uppernarsaavoq, oqarluni savalimmiormiut namminneq aalajangerumagaat arfernik annernik arfanniartaleqqinnissartik - nungusaataanngitsumik toqutsigasuarnerlu tunngavigalugu.

Joensen Folketingimi naalakkersuisuutitallit nr. 90-issaraat, taamaammallu naalakkersuisuutitallit isumaat akerleralugu tunuassagaluarpat naalakkersuisooqatigiit amerlanerussutaarussinnaapput.

- Uangali inissisimanera naalakkersuisuutitallit atornerlussanngilaat, atorluassavaat, jp.dk-mut oqarpoq.

Lene Espersenilli savalimmiormiut arfanniartarnerannut tunngatillugu nutaamik isumaqatigiissusiornissaq soqutiginngilaa.

- Inuiaat kikkulluunniit kissaateqarpata nutaamik arfanniartarnissaannut ammaatiinnarsinnaanngilavut. Savalimmiormiut isummersuutaat nungusaataanngitsumik piniarnissamut tunngasortalik soorunami paasisinnaalluarpara, kisianni kinguneqarluartussaq eqqarsaatigalugu qanoq siunnersuuteqassanerluta aalajangertariaqaratta taamaaliorpugut, ministeri oqarpoq.