Savalimmiormiut tunngaviusumik inatsisissaq 2018-imi taasissutigissagaat
Savalimmiormiut lagmandiat Aksel V. Johannesen ukiortaami oqalugiarami tamanna naqissuserpaa, nittartagaq Det Færøske Nyhedsbureau taama allaaserisaqarpoq.
Savalimmiormiulli taasitinneqarnissaat Lagmandip ullulinngilaa.
Innuttaasunik taasititsinissaq 2018-imi apriilip 25-anut inissinneqaqqaaraluarpoq, tamannali siorna oktobarip qaammataani allanngortinneqarpoq.
AAMMA ATUARUK Savalimmiuni tunngaviusumik inatsisissatut siunnersuut itigartitsissutigineqanngitsoq
Tunngaviusumik inatsisitaarnissaq pillugu siunnersuut Savalimmiormiut inatsisartuini naammassillugu suliarineqanngitsoorpoq. Innuttaasunillu taasissutigineqassappat ukiup affaa sioqqullugu naammassineqartariaqarpoq.
Tunngaviusumik inatsisissatut siunnersuut aasaq tusarniaassutigineqarmat Danmarkimi ministereqarfinnit akuerineqarpoq, ministereqarfiillu naqissuserpaat siunnersuut danskit tunngaviusumik inatsisaannut unioqqutitsinngitsoq.
Det Færøske Nyhedsbureau naapertorlugu lagmandip Aksel V. Johannesenip arlaleriarluni erseqqissaatigisimavaa tunngaviusumik inatsisissaq Danmarkimit avissaarnissaq pillugu allagaataanngitsoq, Savalimmiormiulli kinaassusiannik isumannaarinninnissamut tunngassuteqartoq.
AAMMA ATUARUK Savalimmiormiut siunnersuutaata akuerineqarnera aqqutissiuisinnaavoq