VIDEO Savaatillit sialussaaleqipput
Aasaq manna kujataa sialoqanngingajavippoq.
- Juunip 19-ianiisoraara, kingullermik siallerpoq, tamatuma kingornatigut immaarakasik sialualuit eqqaassanngikkaanni, tassa ulloq manna tikillugu sialleqqinngilagut, Savaatillit peqatigiit suleqatigiissut siulittaasuat Frederik Frederiksen KNR-imut oqarpoq.
Tamatuma kinguneranik savaatillit narsaatini ivikkanik naatitsiniarnerat iluatsippiarsimanngilaq.
- Tassa maannakkut panertorujussuuvoq. Suna tamarmi asinngartilernikuuvoq. Taava aamma narsaatit panertorujussuugami naaneri annikitsuarakasiipput, isugutasortaani massikkaluarput, kisianni panernerusoq tamarmi naanerloqaat. Sunniuteqarnerluppoq, annertuumik kinguariartupallattoq naatsorsuutigivara ivikkanik katersuinerup tungaatigut, Frederik Frederiksen oqarpoq.
Ukiuuneranilu savanut nerukkaatissat nunanit allanit tikisinneqareersut amigassasut naatsorsuutigineqalerpoq.
- Nerukkaatinik piniaqqinnissaq naatsorsuutigisariaqarpoq, tassami piniartarnerput najoqqutaralugu ukioq manna piniakkagut ippassaanikkunni tikipput. Kisianni taakku takusinnaanngoreerparput amigartussat, Frederik Frederiksen oqarpoq.
Savaaqqanillu toqoraasoqalerpat aamma savat oqimaassusaanut tamanna sunniuteqassangatinneqarpoq. Ajornerpaamilli pisoqassappat savaatillit ilaasa savaatitik ikililertariaqassagaat naatsorsuutigineqarpoq.
Kujataani narsaatinik naatitsiniarnerup ukioq manna iluatsippiannginnerata kingunerisinnaasai pillugit savaatillit peqatigiit suleqatigiissut ataatsimiillutik oqaluuserissagaat aamma pilersaarutigineqarpoq.