Savaatillit Peqatigiit Suleqatigiissut: Erseqqissumik ilisimatitsisoqartariaqarpoq

Kujataa kulturikkut eriagisassatut allattorsimaffimmut ilanngukkusulerpoq, Naalagaaffiit Peqatigiit ilinniartitaanermut, ilisimatusarnermut, kulturimullu Suleqatigiiffiiup UNESCO-p allattorsimaffianut ilanngukkusulerami. Savaatillit Peqatigiit Suleqatigiissut tamanna akerliuffiginngikkaluarlugu apeqquserpaat.
Allattoq Mads Lynge
aggustip 05-at 2009 15:44

Peqatigiiffiup allaffiani pisortaq Kaj Egede ima oqarpoq:

- Assigiinngitsunik apeqquteqarnikuuvugut, savaatillit siulersuisuisa savaatillillu ataatsimeersuarnerisa arlariit pinerini oqallisigineqartarnikuuvoq savaateqarnermut akornutaannginnissaa, nunalerinerup ataatsimut isigalugu ineriartoqqissinnaanera killiliisuunnginniissaa savaatillit tungaaninngaanniit tupinnanngitsumik piumasarineqarpoq, Kaj Egede oqarpoq, nangillunilu:

- Eriagisassatut aalajangiiniarnermi nunaminertat sorliit pineqarnersut erseqqissumik nalunaarutigineqassasoq aamma piumasarineqarpoq, Kaj Egede oqarpoq.

Matumani tusarniarneqarsimavisi?

- Tusarniaaffigineqarnikuuvugut, kisianni tusarniaaffigineqareerluta siunnersuut allanngorteqqinneqarnikuusoq ilisimavarput aammalu paasiumasagut nunaminertat sorliit pineqarnersut ulloq manna tikillugu erseqqissumik ilisimatitsissutigineqanngilaq, savaateqarnermullu akornutaanginnissaannik neriorsuuteqarnissaq utaqqivarput, Savaatillit Peqatigiit Suleqatigiissut allaffianni pisortaq Kaj Egede oqarpoq.

Radioaviisp paasisai naapertorlugit kulturikkut Kujataani eriagisassatut allattorsimaffimmut ilanngussassatut siunnersuutit katillugit tallimaapput, tassa Qassiarsuk, Igaliku, Sissarluttoq, Vatnahverfi aamma Qaqortukulooq - Upernaviarsuk allattorsimaffimmut ilanngunneqarnissaat siunniunneqarmat. Taakku katillugit 226 kvadratkilometerimik annertussuseqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq