Mingutsitsinikkut koruunit miliuunit arlalissuit annaaneqarsimassangatinneqarput.
Sarfaq Ittuup sapaatip akunnerani kingullermi Hirtshalsimi amutsivimmiitilluni qatserutit misilittarneranni mingutsitsisoqarmat imaq 10 kubikmeteritut annertutigisoq erngup aqqutaanut akulerunneqarsimavoq.
Mingutsitsisoornerup kinguneranik Hirtshalsimi aalisakkeriviit ulluni marlunni unitsinneqarput illoqarfimmilu sumiiffik annertujaaq mingutsinneqanngitsumik imissaarulluni.
Hjørring kommunip upalungaarsimanermut pisortaa Knud Børge Møller oqarpoq, arlaata slangit marluk kukkulluni atassusertoornerisigut mingutsitsisoqarsimasoq.
Hirtshalsimi amutsivimmi sulisut kukkusimanatik Sarfaq Ittummi inuttat pisuutippaat. arctic Umiaq Linemiilli uppernarsaasoqartinnagu kukkunermut akisussaasoorusunngillat.
- Sarfaq Ittuup amutsivimmiinnera uppernarsarsinnaavarput mingutsitsisoqarsimaneralu ilisimallugu, pisimasorli oqartussanit nalilerneqartariaqarpoq, umiarsuaatileqatigiiffiup pisortaa Jette Larsen oqarpoq.
Hjørring kommunimiit nalunaarput mingutsitsisoorneq sillimmasiisarfinnut nalunaarutigineqareersoq akisussaatinneqartussallu inatsisilerituunit isumagineqassasut.
Nordjyske Tidendemi allaaserisaq naapertorlugu Hirtshalsimi aalisakkeriviit koruuninik miliuunerpaalunnik annaasaqarsimapput, suliffeqarfiilli taakkua annaasaat sillimmasiisarfinnit matussuserneqarnissaat ilimanarpoq.