Sara Olsvigip Unicefip Nuummi allaffittaava siuttuuffigissagaa
Sara Olsvig siorna novembarimi siulittaasutut inatsisartunilu ilaasortatut tunuarniarluni aalajangiuppaa, maannakkullu UNICEF Danmarkip nunatsinni suliniutinut pisortaatut atorfinissalluni akuersivoq.
UNICEF Danmark tusagassiorfinnut nalunaaruteqarluni taama ilisimatitsivoq.
- Suliassaq pingaaruteqartoq akisussaaffigilissallugu tulluusimaarutigaara. UNICEF nunarsuarmi meeqqanut suliniaqatigiiffiit annersaraat ukiunilu qulinngulersuni Kalaallit Nunaanni meeqqat pisinnaatitaaffii pillugit suliniuteqaqataasimalluni, Sara Olsvig taama oqarpoq.
AAMMA ATUARUK Sara Olsvig Inuit Ataqatigiit siulittaasuattut tunuartoq
Sara Olsvigimik atorfinitsitsineq ilutigalugu UNICEF Danmark Nuummi nutaamik allaffittaassaaq, taamaalillunilu suliniaqatigiiffik ulluinnarni ersarinnerusumik sinniisoqalissalluni.
UNICEF Danmarkip qullersaa Steen Andersen, Sara Olsvigimik tikilluaqqusinissaminut qilanaarpoq.
- Politikkikkut misilittagaqarluarnera Kalaallit Nunaanniillu ilisimasaqarluarnera aammalu Kalaallit Nunaanni ineriartornermik pimoorussilluni kivitseqataanera pissutaallutik Sara uatsinnut, Nakuusamut Kalaallillu Nunaanni meeqqanut sullitatsinnut assorsuaq iluaqutaassaaq, Steen Andersen oqarpoq
Meeqqat pisinnaatitaaffii pillugit UNICEF-p ingerlatai Sara Olsvigimut takornartaanngillat, siornatigut nunap inoqqaavinut inuillu pisinnaatitaaffiinut tunngasunik ilaatigut Inuit Issittormiut Siunnersuisoqatigiivini ICC-mi suliaqareernikuummat. Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisuusimanermigut Kalaallit Nunaanni pissutsinut ilisimasaqarluareerpoq soorluttaaq Nakuusap suliaanut ilisimasaqarluareerluni.