Sara Olsvigip inunnik isumaginninnermut ministerip ataatsimeeqatiginera iluarusuutigaa
Ingammik suliniutinut assigiinngitsunut aningaasaliissutit, Danmarkimi aningaasanut inatsimmi siorna ukiakkut akuersissutigineqartukkut atajuartussanngortinneqarmata.
Tamatuma peqatigisaanik isumaginninnermut ministeriaqarfik, kalaallinut atugarliortunut Danmarkimiittunut periusissamik suliaqarnissaminut ukiunut sisamanut atuuttussamik 13,4 millionit koruuninik aningaasaliiffigineqarmat.
Aningaasat ilaatigut kalaallit Danmarkimi inuiaqatigiinnut akuunerulersinnissaannut aamma kalaallit Danmarkimut nuuttut inuuniarnikkut atugaannik qulaajaanermut atorneqassapput.
Isumaginninnermi ministeriusartut nikerarnerat unammillernartuusimasoq Sara Olsvigip oqaatigaa.
- Taamaattumik uannut pingaaruteqarpoq ministerit ataatsimeeqatigisarnissaat IA-p Folketingimi suliarisai sammillugit ukkatariinnarnissaat qulakkeerniarlugit, Sara Olsvig erseqqissaavoq.
Aamma inatsisitigut ataataqanngitsut pillugit inatsit akuerineqaqqammersoq Manu Sareenip ataatsimeeqatiginerani eqqartorneqarmat Sara Olsvigip iluarisimaarpaa, aammalu Folketingip Kalaallit Nunaannut tunngasunut ataatsimiititaliaata inatsit pillugu isumaliutissiissutaa danskit naalakkersuisuisa tigulluarmassuk nuannaarutigalugu.
- Qilanaarisorujussuuara inatsisitigut ataataqanngitsut qasserpiaanersut paasinissaat, kiisalu amerlaqisut inuttut sunnerneqaatigisimasaasa ilisimalernissaat.
