Sara Olsvig politikerinut: Inatsisissaq peqqissaarussiuk
Coronavirusip tuniluunnerata siaruaatinnginnissaa pillugu oqartussat assigiinngitsunik innersuussuteqarput ilaatigut uagut inuiaqatigiiusugut qanoq iliuuseqarnitsigut siaruatsaaliueqataasinnaanissatsinnik. Niuertarfiit matoqqagallarnissaat pillugu politiit naalakkiuteqarsinnaanngillat aamma innersuussutaasut sinnerlugit inuit katersuuppata politiit qanoq iliuuseqarsinnaanatik.
Inatsisinilli allannguinikkut, soorlu angerlarsimaffinni aalakoorluni nuannannerit inuppassuarnit peqataaffigineqarpata, politiinit unitsinneqarsinnaalissapput.
Coronavirusip atugaanerata nalaani inatsisinik sukaterisariaqalerneq, Inuit Pisinnaatitaaffii pillugit Siunnersuisoqatigiinnit paasineqarluarsinnaasoq, siunnersuisoqatigiit siulittaasuata, Sara Olsvigip paasilluarsinnaallugu oqarpoq naqissusiillunili aamma oqarluni inatsisissaq taama pingaaruteqartigisoq pillugu politikerit eqqarsarluarlutik allannguissasut.
- Inatsisinik allannguinissaq paasisinnaalluarparput. Politikerilli allannguilerpata eqqaamasassaattut pingaarnertut taarusutarput tassaavoq pineqartut, tassa innuttaasut tunngaviulluinnartumik pisinnaatitaaffii, assersuutigalugu kiffaanngissuseqarluni katersuussinnaanerit, angalalluni allamukarsinnaalluni pisinnaatitaaffik assigiinngitsutigullu kiffaanngissuseqarluni periuseqarsinnaanerit innarlerneqannginnissaat, Sara Olsvig oqarpoq.
Maannakkorpiaq pissutsit eqqarsaatigalugit inatsisip allanngortinneqarnissaa sulissutigineqartoq 2021-mi decembarip ulluisa 31-annut atuuttussatut Naalakkersuisunit piumasarineqarpoq.
Atuuffissaali nallertinnagu coronavirusi ajornartorsiutaajunnaassappat piaartumik inatsit allanngorteqqinneqartariaqartoq, Sara Olsvigip Inatsisartunut eqqaamaqquaa.
- Sukatererujussuarluni eqqussiniarnermi pisinnaatitaaffiit pineqarnerat ilisimaarerujussuarneqarnera eqqaasitsissutigerusupparput minnerunngitsumillu aamma inatsisinik sukaterinerit taamaattut eqqunneqarpata , atorunnaarsinnissaanut periarfissaq siulleq, tassa sukaterinerit pisariaqarunnaarpata inatsisit atorunnaarsinneqarsinnaanerat eqqaamaneqartariaqarpoq. Tassami innuttaasut pisinnaatitaaffii tunngaviulluinnartut uani pineqarmata, Inuit Pisinnaatitaaffii pillugit Siunnersuisoqatigiit siulittaasuat, Sara Olsvig kaammattuivoq.