Sara Olsvig: Partiit tamarmik isumaqatiginninniarnermut maanna aggersarneqarlik!
Naalakkersuisorli allatut suleriuseqarnini paragraf 37 aqqutigalugu apeqquteqaammut akissutimini nassuiaavoq.
Inuit Ataqatigiilli siulittaasuannit tamanna naammagineqanngilaq.
- Aalisarnermut, Piniarnermut Nunalerinermullu Naalakkersuisup akissutaa assut pakatsissutigaarput, Sara Olsvig tusagassiuutinut nalunaxarummini taama allappoq.
Naalakkersuisup tusagassiuutinut oqaatigereernikuuaa ”Nuna tamakkerlugu aalisarnermut inatsisip isumaqatigiissutigineqarnissaa anguniagaavoq” kiisalu ”Inatsisartuni illuatungiliuttunik isumaqatiginninniaqateqassaanga, inatsit sapinngisaq tamaat siamasissumik tunuliaquteqartinniarsaralugu”. Naalakkersuisorlu KNR-imiillu apersorneqarami suli tamanna aaliangiusimagini oqaatigaa.
- Siullermik erseqqissaatigissavara Naalakkersuisuninngaanniit pingaartittorujussuugatsigut partiit tamarmik, susassaqartut, kattuffiit, suliffeqarfiit minnerunngitsumillu aalisartut piniartullu tusarniaanermi ilanngunneqarnissaat, Erik Jensen oqarpoq.
Taamaaliortoqarnissaali maannakkut pisariaqartoq Sara Olsvig isumaqarpoq.
- Nuna tamakkerlugu isumaqatigiissutigineqartumik naammassisaqartoqarnissaa aallaqqaataaniilli piumasarisimavarput partiitullu illuatungiliuttuni siuttutut inatsisissaq pillugu kinguneqarluartussamik isumaqatiginninniarnernut peqataanissarput akisussaaffittut isigaarput, Sara Olsvig allappoq.
Pragraf 37-imi aqqutigalugu apeqquteqaatimini akissummi taamaattoqanngissoraa.
Aalisarnermut, Piniarnermut Nunalerinermullu Naalakkersuisoqarfik qinnuigaara inatsisissatut siunnersuummik piaartumik suliaqaqqullugu. Tamanna tunniunneqarsimatinnagu inatsisissatut siunnersuut Naalakkersuisut iluminni suliassaattut isigineqassaaq.
Tamannali Inuit Ataqatigiit isumaqatiginngillaat.
- Naalakkersuisut siamasissumik isumaqatigiissuteqartoqarnissaa maannakkut kissaatigigunikku, inatsisissatut siunnersuummi sammiviit pingaarnerit inissisiterneqannginneranni, partiit peqataatittariaqarpaat. Inuit Ataqatigiinnit piareersimavugut. Naatsorsuutigaarput siorna ukiaanerani inatsisissatut siunnersuutaagaluarsimasumik siullermeerinninnermi iluatsitsinngitsoorsimaneq ilinniarfigisimallugu partiinik isumaqatiginninniavinnissaq uatsituulli Naalakkersuisut pingaartitsigissagaat, allappoq.
Inatsisissarlu piareeqqaarlugu saqqummiunnissaa Erik Jensenip ajornartoqartinngilaa.
- Isumaqarpunga siumut oqareertoqarsinnaanngitsoq suna qanorlu pilliutaassanersoq, oqaloqatigiinnerit ingerlaqqaartussaammata inatsisissarlu suli saqqummiunneqarnikuunngimmat.
Politikkikkut anguniakkat aalisartunullu amerlanernut pisassiissutit agguaanneqarnissaat taassuma naqissuserpaa.
- Aalisarnermut inatsisissap ilusilersorniarneqarnissaat soorunami tusarniaanermi akissuteqaatit naammasseriarpata ilusilersuinermi oqaloqataanermilu assigiinngitsut ilaatinneqartussaapput, imaanngilaq aallaqqaataaneerneqassasoq suna tamarmi. Tassami inatsisissatut siunnersuut politikkikkullu anguniagaq taannaavoq, aammalu tamatta nnaammasseqatigiilluta ilusilersorsinnaagipput qularutiginngilara.
Isumaqatiginninniarnissamut piaartumik qaaqqusisoqassasoq Sara Olsvigip kaammattuutigaa. Ataatsimoorlunimi inuussutissarsiutip pingaarnerpaap tunngavilersorluarneqarniassammat, taanna naggasiivoq.
