Sara Olsvig: Nunat inoqqaavisa kattuffii tapersersorluarneqarlik

Nunat inoqqaavisa kattuffiisa Issittumi Siunnersuisoqatigiit ataatsimiinneranni peqataaneruleqqullugit, aningaasatigut ikorfartorneqarnissaat qulakkeerneqartariaqarput. Issittumi Siunnersuisooqatigiinni sulinermi aamma maannakkutut ukiut marlukkaarlugit pilersaarusiortoqartarunnaarluni, ungasinnerusoq eqqarsaatigalugu sulisoqartariaqalerpoq. IA sinnerlugu folketingemi ilaasortaq, Sara Olsvig taama oqarpoq.
Allattoq Sorlannguaq Petersen
apriilip 25-at 2012 07:10

Taannalu Issittumi inatsisartut ataatsimiisitaliaanni ilasortat allat peqatigalugit Issittumi Siunnersuisooqatigiit qanoq nukittorsarneqarnissaanut nalunaarusiamik suliaqaleruttorput.

Ilisimatuut 3000-it missaanniittut nunanit 47-neersut nunani tamalaani Issittup ukiui, 2007-mi aallarnerneqartut naammassineri nalliussiniarlugit Montrealimi maanna isumasioqatigiipput.

Ilisimatuut isumasioqatigiinnerisa saniatigut, Issittumi inatsisartut ataatsimiititaliaat, SCPAR, aamma ataatsimiipput. Tassanilu naalakkersuinikkut ingerlatsinikkut nalunaarusiassamut missingersuussaq saqqummiunneqarpoq. 

Naalakkersuinikkut ingerlatsinermi Issittumilu ineriartortitsinermi inuk qitiutinneqassasoq, Sara Olsvig inatsisartunilu ilaarsotaaqatai isumaqarput. Taamaattumillu Issittumi nunat inoqqaavisa kattuuffii ikorsiorneqarnissaat sulissutiginiarpaat.

- Allannguutitut siunnersuutigut arlaqarput, nunat issittut akornanni ilinniatitaanikuut ilisimatusarnikkullu suleqatigiinnerulernissaq. Aamma nunat inoqqaavisa kattuffii peqataasartut arfinillit, aningaasatigut ikorfartorneqarnerulernissaat peqataanissaannut periarfissinneruniarlugit, Sara Olsvig oqarpoq.

Issittumi inatsisartut nalunaarusiaat naalakkersuinikkut ingerlatsinermut tunngasoq, suli piareersarneqarpoq, ataatsimiinnernilu tulliuttuni inaarneqassalluni. Ataatsimiinnerup tullia juunip aallartilaarnerani Nuummi pissaaq, ataatsimiititaliap Islandimi illoqarfimmi Akureyrimi septembarimi isumasioqatsigiinnissaanni naluunarusiap inaarneqarnissaa  naatsorsuutigineqarpoq.

Taamaattorli Issittumi inatsisartut ataatsimiititaliaata erseqqissitereerpaat, Issittumi siunnersuisooqatigiit naleqqussartariaqartut, Issittup nunanit tamalaanit soqutigineqarnerulernera aallaavigalugu.

- Massakkut Issittumi siunnersuisooqatigiinni, ukiut marlukkaarlugu siulittaasoqartarpoq, taamaattumik siunnersuuisooqatigiiffiup sulinera, taamaallaat ukiut marlukkarlugit pilersaarusiorneqartarluni.

- Massakkut nalunaarummi siunnersuutigaarput, ukiut qulikkaartunik pilersaarusiortoqarsinnaanissaa anguniarneqassasoq. Issittumi inatsisartut ataatsimiititaliaanni ilaasortaq, Sara Olsvig oqarpoq.

Issittumi Inatsisartut aataatsimiititaliaat, SCPAR, Nunat Aavannarliit Siunnersuisoqatigiiffiata siunnersuuteqarneratigut 1994-mi pilersinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq