Sara Olsvig NATO-mi ataatsimeersuaqataasoq
Ataatsimeersuarnermi nunat tamalaat akornanni illersornissatigut suleqatigiinnerannut tunngasunik unammilligassanik paasitinneqarput, pingaartumik Kangiani qiterlermi akerleriinnernut tunngatillugu. Unammilligassaq annertunerpaaq tassaavoq nunat NATO-mut ilaasortaasut arlallit illersornissamut aningaasaliissutiminnik ukiuni makkunani annikillisaanerat.
Angalaqatigiit Californiami San Diegomi amerikamiut sakkutuuisa imarsiortut sakkutooqarfiannut pulaarput, tassanilu Manerassuarmi sakkutooqarfinnik Manerassuarmilu pisunut tunngasunik oqaluttuunneqarlutik. Taamatuttaaq amerikamiut sorsuutaannut imarsiortunut sungiusarnermilu atortunut tunngasunik takusaatinneqarput.
-Tassani amerikamiut sorsuutaat imarsiortut qulimiguulinnik “Sea Hawk”-inik taaguuteqartunik atugaqarput, taakkorpiaallu danskit illersornermut atugassatut pisiassatut aalajangiivigisimavaat qulingiluallu pissarsiarisussaallugit. Taakkunannga marluk Issittumi illersornissamut upalungaarsimanermi SAR-imi atorneqassapput. Qulimiguullit pillugit oqaluttuunneqarnerput takusaanerpullu assut pissarsinarpoq, taakkorpiaammi amerikamiut misilittagaqarfigilluarpaat”, Sara Olsvig oqarpoq.
USA-p illersornissamut naalakkersuisoqarfiata Issittumi Iliuusissiaq novembarimi saqqummiuteqqammerpaa. Tassanilu Issittumi suleqatigiinnissaq pisariaqarluinnartuusoq pingaartinneqarpoq. Angalanermittaaq USA-mi danskit ambassadøriannut neriartorneqarpoq, tassanilu Issittumi tunngasut Sara Olsvigimit qaqinneqarput.
-Issittumut politikkissamut tunngatillugu aalajangersaanissamut USA kigaannerpaasimavoq. Taamaattumik illersornissamut tunngatillugu iliuusissiaat kiisami atuarsinnaanngorlugu soqutiginartuusimavoq. Uatsituulli Issittumi sakkut atorlugit akersuuttoqarnissaanut ilimasunngillat, taamaattorli Issittup maannakkut ineriartornera eqqarsaatigalugu nakkutilliinikkuttaaq eqeersimaarnerunissaq paasisimavaat. USA-p 2015-ip tungaanut malittarinissaa pissanganarpoq, taamanikkussamummi Canada taarserlugu Issittumi Siunnersuisoqatigiinni siulittaasuuffimmik tigusissapput, naatsorsuutigineqarsinnaasutullu ataatsimut isigalugu Issittumut tunngasutigut aallussaqalissallutik, Sara Olsvig oqarpoq.
