Sara Olsvig Aningaasat satspuljemeeersut tapiissutit avaqqullugit aningaasaliissutaanngillat
Kalaallit Nunaanni isumaginninnittoqarfik katillugit 10 millionit koruuninik ukiuni sisamani tulliuttuni Danmarkimit tapiiffigineqassaaq.
Kalaallit Nunaalli aamma pilliuteqartoq Sara Olsvig isumaqarpoq:
- Kalaallit Nunaat Danmarkimut nunanullu avannarlernut allanut meeqqat inuusuttullu kannguitsaatsuliorfigineqarsimasut pillugit paasisanik tunniussuivoq, taamaattumik paaseqatigiilluta suleqatigiippugut. Suleqatigiinnerup ingerlateqqinnissaa kissaatigineqarmat ukiunut sisamanut tulliuttunut aningaasaleeqqipput, Sara Olsvig KNR-imut taama oqarpoq.
Sara: Isumaginninneq nunatta pingaartippaa
Aalborg Universitetimi lektori Ulrik Pram Gad naapertorlugu taama aningaasaliineq naalagaaffiup ukiumoortumik tapiissutai avaqqullugit tapiissutaapput.
Taassumami isumaa naapertorlugu Namminersorlutik Oqartussat Danmarkimit immikkut siunnersuisartunik sulisitsisinnaagaluarput.
Aamma atuaruk Ilisimatooq: Ataatsimoortumik tapiissutit avaqqunneqarput
Inuit Ataqatigiit ukiuni kingullerni aningaasanut inatsisissamut taaseqataasarsimanngilaat. Naalakkersuisuinili isumaginninnermut tunngasut pingaartinneqartupilussuusut Sara Olsvig erseqqissaavoq.
- Aningaasanut inatsisissap isumaqatigiinniutigineqarnerani Naalakkersuisut isumaginninnermut tunngasut pingaartittupilussuuaat. Taamaattumik tassuuna suliniuteqareerpugut.
Ataatsimoortumik tapiissutit ikilisinneqarnissaannik kissaateqarneq
Inuit Ataqatigiit kissaatigaat aningaasanut inatsisissamut aappaagumoortumut 5 millioner koruunit meeqqanik inuusuttunillu isumassuinermut atorneqassasut.
Ukiulli nikinnerani partiip kissaatigaa Naalagaaffiup tapiissutai 10 millioner koruuninik ilanngarneqassasut.
Aningaasat taakku suliniutinut aningaasaliissutinit Danmarkip tapiissutigisaasa amerlaqatigaat.
Aperineqarami Nunatta Danmarkimit tigoreersimasaanut allanut Danmark aningaasaleeqqissanersoq, Sara Olsvig ima akivoq:
- Kalaallit Nunaat imminut mattunnissaminik eqqarsaateqanngilaq. Aamma namminersuleraluaruniluunniit. Nunat assigiinngitsut akornanni suleqatigiinneq pitsaasuujuaannarpoq, ingammik suleqatigiissutissat inunnut tunngasuuppata. Taamatullu suleqatigiinneq ingerlaannassaaq qanorluunniit Kalaallit Nunaat inissisimagaluarpat.
Sara Olsvig oqarpoq.