Ilisimatooq: Ataatsimoortumik tapiissutit avaqqunneqarput

Namminersorluni Oqartussaanerup inatsisaani naalagaaffiup tapiissutai pillugit isumaqatigiissummut aporaappoq, Kalaallit Nunaat aningaasanik isumaginninnikkut Danmarkimi atugassanik aningaasatigut tapiiffigineqarpat. Kalaallit politikkiannik immikkut ilisimasalik taama isumaqarpoq. Venstrelli isumaqatigiissut illersorpaat.
Assi © : Institut for Statskundskab, Københavns Universitet
Allattoq Helle Nørrelund Sørensen
novembarip 17-at 2016 11:05
Nutserisoq Erna Lynge

Isumaginninnerup tungaatigut atugassanik Kalaallit Nunaat ukiuni tulliuttuni sisamani Danmarkimit 10 millioner koruunit naliginut ikiorserneqassaaq.

Danskit pilersaarutinut suliniutinullu aningaasaliissutaat aqqutigalugit aningaasaliisoqarpoq.

Aalborg Universitetimi ilisimatooq Nunatsinnilu pissutsinik ilisimasalik Ulrik Pram Gad isumaqarpoq naalagaaffiup ataatsimoortumik tapiisarnera pillugu isumaqatigiissummut taamaaliorneq aporaattoq.

- Siullertut naalagaaffiup tapiissutaanik aalajangersakkanik avaqqutsineruvoq. Kisitsisit aalajangersakkat 2009-meersut nikinnaviigaasussaapput siunissamilu immaqa appartinneqarsinnaallutik. Maannali qaavatigut aningaasaliisoqaqqippoq.

Isumaginninnermut ministereqarfik naapertorlugu 10 millionit koruunit Danmarkimi Isumaginninnermut- maalaaruteqartarnermullu aqutsisoqarfinniit pilersaarutinut isumaginninnikkullu Nunatsinni sulisussanut siunnersuisussanut atorneqassapput.

Taamaalillutik aningaasat toqqaannartumik Nunatta karsianut nakkarunnanngillat.

Namminersorlutilli Oqartussat namminneq pilersaarutinut aningaasaliisimasinnaagaluartut, Ulrik Pram Gad isumaqarpoq.

- Kalaallit Nunaata nammineq pingaarnersiorfigisimasassaa Danmarkip neqerooruteqarluni pingaarnersiorfigaa. Suliassat pingaartissimagaanni sooq taava landskarsimiit sullissinerit nammineq akilerlugit pisiarineqanngillat.  Naalakkersuisuutitaqartuni Venstreni isumaginninnermut oqaaseqartartoq Carl Holst isumaqarpoq tunuatigoortumik aningaasanik tapiisoqanngitsoq.

- Bloktilskud tapiissutaapput naalagaaffimmit tapiissutaasut nammineq aalajagiiffigisassat. Uanili aningaasaliissutit isumaginninnikkut siunertamut tapiissutaapput tunuatigoortuunngitsut, kalaallinulli inuuniarnikkut ajornartorsiortunut ajunngisaarutit.

Nassuerutigaali Kalaallit Nunaannut ikiorsiissutit 10 millionit koruunit aamma Danmarkimi isumaginninnikkut unammilligassanut aaqqiissutaasinnaammata.

Suliniutinut assigiinngitsunut aningaasaliissutit isumaginninnermut naalakkersuisup Sara Olsvig tusagassiuutitigut ima oqaaseqarfigai:

- Nunaqqatitta inuuniarnikkut ajornartorsiuteqarnertik pissutigalugu Danmarkimut nuuttarnerat pinaveersaartissagutsigu Danmarkip suleqatiginissaa pingaaruteqarpoq. Aammali meerartatta inuusuttortattalu tunngaviusumik ajunnginnerusumik atugaqarnissaasa qulakkeernissaannut, Sara Olsvig oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk