SAR-imik upalungaarsimasut assiliissummik inuup kissaanik malussarsinnaasumik taartumilu qinngummik atortorissaaruteqalissapput
DR-ip aallakaatitassiaata De Arktiske Reddere-ip immikkoortuata aappaa kunngeqarfimmi tamarmi tv-kkut ulluni makkunani aallakaatinneqarpoq, tassanilu Air Greenlandimi ujaasinermik annaassiniarnermillu suliaqartartut (SAR) malinnaaffigineqarsinnaapput.
Isiginnaagassiami inunnik pinngortitarujussuarmi ammaannartumi inunnik ujaasinerup qanoq ajornakusoortigisinnaanera ilaatigut takutinneqarpoq.
UJaasinermik suliaqartartut sulisarnerat maanna ajornaannerulertussanngorpoq.
Air Greenlandip Illersornissamullu ministereqarfiup atortunut pisiniarnermullu aqutsisoqarfia (FMI) assiliissummik inuup kissaanik malussarsinnaasumik taartumilu qinngutigineqarsinnaasumik pisinissamut isumaqatigiissuteqarpoq.
Taakku tusagassiuutinut nalunaarummi ataatsimut allapput.
Inuuneq toqulu
Assiliissut inuup kissaanik malussarsinnaasoq, nunami ujaarineqartumut takunnissutaasinnaavoq.
Tamanna ujaasinermut sivikinnerulersitsillunilu annaassiniarnermik suliaqarnermut pitsanngorsaataassaaq.
Air Greenlandip pisortaanera, Jacob Nitter Sørensen tusagassiuutinut nalunaarummi paasissutissiivoq.
- Atortorissaarutit taakku ujaasinissami annaassiniarnissamilu upalungaarsimanermut pingaaruteqartupilussuupput, inuunermut toqumulluunniit piffissaq pingaartuummaat.
Taassuma atortorissaarutit nutaat kisimi nuannaarutiginngilai.
Folketingimut ilaasortap, Aaja Chemnitzip (IA) nuannaarnini pissarsinissamullu suleqataasimanini aamma oqaatigaa.
- Aallakaatitsinerit siulliit kingorna Air Greenland ikioqatigalugu iluatsippara, helikopterip annaassiniarnermut atorneqartartup qinngornerit infrarødit atorlugit ujaasissummik FLIR-imik unnuakkullu isigisaqarsinnaanermut atortorissaarummik NVG-mik atortulernissaanut aningaasaliisoqarnissaa, taamaalilluni ujaasinerit annertuumik ajornannginneruleqqullugit, taanna Facebookikkut allappoq.
Angusaq pingaaruteqartoq
Air Greenlandip Issittumi Sakkutooqarfik suleqatigalugu atortorissaarutit nutaat atulersinneqarnissaat sulissutiginiaritsik tusagassiuutinut nalunaarummi paasissutissiissutigaa.
Tamanna ukiup ingerlanerani aallartinneqarnissaa naatsorsuutigaat, atortorissaarutillu kingusinnerpaamik aappaagu marsimi tamakkiisumik atulersimassallutik.
Silaannakkut atortunut akisussaasup, Klaus Qvistip atortorissaarutit nutaat pingaaruteqartut tusagassiuutinut nalunaarummi oqaatigaa.
- Naammagisimaaqaarput maanna angusarput, Kalaallit Nunaanni ujaasinermi annaassiniarnermil upalungaarsimanermik pingaaruteqartumik pitsaassutsip annertusineqarnerata pingaartup qulakkeernera, Klaus Qvist oqarpoq.
