Saqqummersitat assigiinngisitaartut
Assit sammisallu assigiinngitsorpassuusut, eqqumiitsulianik katersugaasiviup pisortaa isumaqarpoq.
- Oqariartuutaani assigiiaartoqarpoq, oqaluttuarnertaali aamma allanngorarlutik, Nuummi eqqumiitsulianik katersugaasivimmi pisortaq, Nivi Christensen oqarpoq.
KIMIK-up nalliuttorsiorneranit suliat 100-ut sinneqartut saniatigut ilusilersugamernit takuneqarsinnaapput, eqqumiitsuliortunilli 18-init takutitsilluni ikkussukkanillu eqqumiitsuliat takussaanngillat.
- Takutitsilluni, ikkussukkanillu eqqumiitsulianik peqaraluarpat torraassagaluaqaaq, taakkuli Nunatsinni atortorsuunngilagut. Siuariangaatsiarsimasugulli isumaqarpunga, Nivi Christensen oqarpoq.
"Lace". Lisbeth Karline Poulsen.
Ilisarititsinerit, "Johan", "Obama-making sense", "Steen", "Simon", "Martin", "Aleqa", Angunnguaq" aamma "Robert". Hari Kristoffersen.Aqerluusamik titartakkat.
Eqqumiitsuliortut qanoq suliaqarneragaasarnerata akerlinganik saqqummersitarpassuit inuiaqatigiinnut tunngasuunerusut, katersugaasiup pisortaata erseqqissaatigaa.
- Nalimini pisunut tunnganerusunik suliaqarput, inuiaqatigiinnut tunngasumik saqqummersitaqarpoq. Kalaallisuunut tunngasumik aamma peqarpoq, kalaallisooq qanoq atorsinnaavarput, aamma amerikami qinersinermut tunngasumik eqqumiitsuliaqarpoq.
Katersugaasivimmi pisortaq oqarpoq nangillunilu:
- Pinngortitamut tunngasumik soorunami aamma peqarpoq - kisiannili aamma allaqqissaamut tunngasunik peqarpoq, tassami Anders Andimut tunngasumik aamma eqqumiitsuliaqarpoq, Nivi Christensen oqarpoq.
"Donald - det er ren Anders And". Miki Jacobsen.
"Trump-masserne." Buuti Pedersen.
Saqqummersitsineq soqutigineqarluarpoq.
