Saqqarmiut tupaallattut
Tassami upalungaarsimanermut ataatsimiititaliap ilaatigut inassutigaa immamut qanissinnaasumik najugallit qullasinnerusumut nuunneqarnissaat. Tamanna Saqqami nunaqarfinni aqutsisuni ilaasortamit, Adolf Jensenimit qisuariarfigineqarpoq:
- Soorunami uku tusakkagut sakkortugamik, allaat nuunnissamik eqqarsaateqaqqullugit, kalerriut taanna sakkortuvoq. Aamma malunnarpoq arlallit tamanna sakkortuumik tigugaat, Adolf Jensen taama oqarpoq.
Saqqami siornatigut qaqqap nakkaaneratigut 2000-imi tassaarsuaqarnikuuvoq. Taamanikkut angallatit nalillit amerlasuut annaaneqarnerat nunaqarfimmi aqutsisumit puigorneqanngillat, taamaammat:
- Taamatut pisoqaqqissanngippat, imaluunniit sillimanerussalluta qatserisartut ittuat maani Saqqami peqatigalugu ataatsimiippugut. Taavalu paasitinneqarpugut ataasinngorpat qatserisartut Ilulissaninngaanniit sillimanissaq pillugu planiliortoqarniartoq, tassa piareersartoqarniartoq. Massakkumut piareersimanissamik arlaannik soqannginnamik, Ilulissaniluunniit.
AAMMA ATUARUK Qaqqanit sisoortoqarsinnaanera aarlerinaateqartoq uippallernanngilarli
Adolf Jensenip oqarnera naapertorlugu Nuussuup qaqqai Saqqap kitaaniittut ilaannilu akianiittut seqummalasuugamik nakkaalaartuartuusut. Taamaakkaluartorli upalungaarsimanissamut ataatsimiititaliap taamatut nalunaaruteqarnera ilumoorullugu nunaqartunit tiguneqarpoq.
- Ernumassutissaqarpoq, upperaarput ilumoorullugu tiguarput aqutsisuninngaanniit taamatut nalunaarnerat. Aamma paasivarput borgmesteri uge 4-mi angalaniartoq paasititsiniaajartorluni, qujanassaqaaq aamma taamatut angalaartoqassappat, Saqqami nunaqarfimmi aqutsisuni ilaasortaq Adolf Jensen KNR-imut taama oqarpoq.
