Sapaatit akunnerini arfineq pingasuni tigummigallarneqassaaq

Nittartakkap Politiken.dk-ip allaaserisaa naapertorlugu, inuusuttut eqqartuussiviup eqqaani  katersuussimasut kamaqalutik Anders Breivikip eqqartuussivimmut apuummat biilit ilaaffigisai aserorterpaat.

Biilit eqqartuussiviup eqqaanut apuummata Breivik tippimik ulissimavoq.

Inuppassuit tuusintilikkaat eqqartuussiviup eqqaani utaqqisut, biilit apuummata nilliapput 'Norge inuummersorli' aamma 'nunarput avissaartuutsissanngilaa', politiken.dk allappoq.

Eqqartuussivimmut sassartitsineq ilimagisamit sivikinneroqaaq. Breivikip eqqartuussivimmut apuunneraniit nalunaaquttap akunnera ataaseq qaangiutinngitsorluunniit sassartitsineq naammassineqarpoq.

Eqqartuussivimmut sassartitsineq matoqqasuuvoq, tusagassiortullu nunarsuarmit tamanit pisut paasissutissinneqarnissaminnut utaqqisariaqarput,  ualeru aatsaat tusagassiortunik katersortitsisoqassammat.

Eqqartuussinerup nalaani eqqartuussisuunerup saniatigut illersuisut unnerluussisullu kisimik eqqartuussivimmiissasut, unnerluutiginnittut piumasaraat.

Ammasumik eqqartuussivimmut sassartitsinerup nalaani, Breivik peqateqarsimaguni taakkununnga oqaaseqariaannaammat, taama piumasaqarput.

Suliaq suli ingerlanneqarmat aammalu sillimaniarnermut tunngasut eqqarsaatigineqarmata eqqartuussivimmut sassartitsineq matoqqatinneqartoq pisortatigoortumik oqaatigineqarpoq.

Ukiuni 21-ni parnaarussassatut Breivik unnerluutigineqarpoq. Unnerluussut Norgemiut pinerliiniarnermut inatsisaat naapertorlugu Breivik pineqaatissinneqartussaassaaq. Ukiuni 21-ni parnaarussaanngippat inuunermi sinnerani tigummisassatut pineqaatissinneqarsinnaavoq.

Sapaatip akunnerini arfineq pingasuni Breivik tigummigallagassaassasoq aalajangiunneqarpoq.