Sapaatip-akunnerata naanera eqqissiviitsoq
Sapaatip-akunnerata naanerani aningaasarsiffik sineriaap ilarujussuani eqqissiviilliorfiungaatsiarsimavoq.
Sapaatip akunnerata naanerani ernguttoqangaatsiarsimavoq, angerlarsimaffinnilu eqqissiviilliornernut arlalissuarnut politiit orniguttariaqartarsimanerarput.
Angerlarsimaffiit eqqissiviilliorfiusut arlaqartut meerartaqarsimallutik.
Eqqissiviilliortitsinerit saniatigut arlalinnik aamma annersaasoqarsimalluni. Imigassartorsimallutillu biilertunik politiit aamma naammattuuisimanerarput.
Erngunnersuup nalaani aamma tillinniartoqarsimavoq, tassa Nuummi Juulimaap allaffia tillinniarfigineqarsimalluni.
Tillinniat Juulimaap allaffianut isersimapput, kalerrisaarulli aallartimmat qimaasillutik.
- Aseruisoqarsimanngilaq, taamaaliornerli juullissamut ernumatsassaarutaavoq, Nuummi politeeq pigaartuusoq Poul Hansen oqarpoq.
