Sangusaartartut Qeqertarsuarmi aliannaalerput
Sangusaarissanik GM-qalerpat peqataasussat 120-t missaaniissapput, Diskomi Sisorartartut Peqatigiiffiat (DSP) aappaagu porskikkunni aaqqissuisuulerpat. Peqatigiiffiup ukiunik 35-nngortorsiorluni aappaagu nalliuttorsiornissaa malunnartinniarlugu GM Qeqertarsuarmut inissinneqaproq. Naallu ulluni taakkunanerpiaq sisoraatinik sangusaartartut Østrigemeersut Nuummut tikittussatut nalunaarsimagaluartut, ataatsimiititaliap Qeqertarsuarmi ingerlanneqarnissaa aalajangiusimavaa.
Siornarniit maanna apineruvoq, aaqqissuisullu pissartanngorniunnissaq takkuppat aputissaaleqinissamik ernumassuteqanngillat.
- Naamik aputaarutiaarnissaa ernumaginngilarput, naallu illoqarfitsinni aputaaraluaraangat, sisorarfipput aputeqartuaannartarpoq, Kali Mølgaard DSP-p siulittaasua knr.gl-mut oqarpoq.
Sangusaarissanik pissartanngorniuffissaq ”Niutaannguani” illoqarfimmiit kangimut 3-kilometerinik ungasissusilimmi ingerlanneqassaaq. Ammullu sisoortarfik kilometerip missaanik takissuseqartoq Kalip oqaatigaa. Aaqqissuussinissallu inissineqarnerat siusissukkut nalunaarutigineqarmat aaqqissuisut piffissaqarluarlutik sulipput.
- Taamaallaat nalunaaqutarput atorluarsinnaagaluartoq suli, ullumikkumut naleqqunnerusumik taarserneqassaaq, Kali Mølgaard knr.gl-mut oqarpoq.
Sangusaarissanik GM kingullermik ukiut 22-it matuma siorna Qeqertarsuarmi ingerlanneqarpoq tassa 1989-mi. Illoqarfiillu peqataatitaqartussat tassaapput Nuuk, Maniitsoq, Kangaamiut, Sisimiut kiisalu aaqqissuisut Qeqertarsuarmeersut.
GM Qeqertarsuarmi ingerlanneqarsinnaanngeriataassappat Sisimiuni SSP sillimasuusoq Sisorartartut kattuffianni sangusaartartut ataatsimiititaliaanni siulittaasoq Finn Løvstrøm nalunaarpoq.
