Sanap avataani sulluliaq nutaaq
Imaatigut kabelip sikumit ajoquserneqarsinnaannginnissaa pillugu sulluliakkoortinneqarniarpoq.
Kabelip Canadamoortup sulluliakkoortillugu isumannaarneqarnissaa pingasunngornermi unnuakkut naammassineqarpoq, kabeli akunnerni 48-ni attaveqanngereerluni attaveqaqqilersinneqarami.
Imaatigut kabeli Islandimoortup suliarineqarnera aallartereerpoq. Kabelilli taassuma isumannaarneqarnissaa ilimagisamit ajornarnerusimavoq, kabelerlu kipineqartariaqarsimavoq, peerneqartariaqarsimallunilu.
Kabelip Islandimoortup naatsorsuutigisamit taamaammat sivisunerusumik attaveerussimatinneqarnissaa naatsorsuutigineqartariaqassasoq Tele-Postip ilisimatitsissutigaa.
Imaatigut kabelip Islandimoortup naammassineqarnissaa atuleqqinnissaalu novembarip 27-ani tamanna pisinnaassasoq naatsorsuutigineqarpoq.
Nunarsuulli sinneranut attaveqarnerup pitsanngorsarneqarniarneranut atatillugu suliaq atuisut maluginavianngilaat, imaatigummi kabelip Islandimoortup suliarineqarnerani kabeli Canadamoortoq aqqutigalugu avammut attaveqartoqassammat.
