Sanaartukkat PCB-tallit pillugit Inatsisartunut nassuiaasoqassaaq
Nalunaarusiami juulimi 2009-meersumi qulaajarneqarpoq, Tuapannguani inissiarsuarni blok Q, R aamma S-imi PCB centimeterinik marlunnik betonimut pulasimasoq, betonilu isatigaq allamut atorneqassappat, PCB-taa piiarneqartariaqartoq.
- Blok Q-mi PCB-mik misissuineq Inatsisartunut maannakkut nassuiaatigissavarput, Avatangiisinut naalakkersuisoq Anthon Frederiksen oqarpoq.
Nuummi inissiarsuit Tuapannguaniittut ilai siorna piiarneqartut betonitai akuutissamik ulorianartumik PCB-mik piffissap ingerlanerani akoqalersimasut siorna apriilimi paasineqarpoq.
PCB-t tassapput chlorimik tunngaveqartumik akuutissiat assigiinngitsut 200-it sinneqartut, 1950-miit 1977 tikillugu sanaartornermi atugaaqisut. Kisianni peqqissutsimut assigiinngitsutigut uloriarnarluinnartut uppernarsarneqarmata, 1977-mi inerteqqutaalerput.
Blok R S-ilu isaterneqarmata betonitaa qeqertat Nuuk Imeq-up inissisimaffigisaata sissaanut nunniuutigineqarput.
Blokili Q isaterneqartillugu nalaatsornerinnakkut paasineqarpoq, betonitaa akuutissamik ulorianartumik akoqalersimasoq.
Immikkut ilisimasallit COWI-meersut sukumiisumik misissuereerlutik nalunaarusiartik 2009-mi juulimi tunniuppaat.
Tassalu Inatsisartut upernaaru ataatsimiilerpata aatsaat nassuiaatigineqassapput.
- Nukinginnarpoq. Nukinginnartorujussuuvoq. Taamaammanuna Inatsisartunut qaqinniaripput. Aamma susuoqarnersoq innuttaasut tamarmik paasiniassammassuk, avatangiisinut naalakkersuisoq oqarpoq.
Tassalu betonit PCB-tallit Nuummi sissami nunniutitut atorneqarsimasut qanoq pineqarnissaat suli aalajangiiffigineqanngilaq. Aamma Nunatta sinnerani illuliortiternermi PCB qanoq atugaatigisimanersoq aamma qulaajarneqanngilaq.
Kisianni 1950-ikkunni, 1960-ikkunni 1970-ikkunnilu PCB-t atugaaruttulerfianni, Nunatsinni sanaartortoqaqaaq.
- Taamammanuna Tuapannguani misisuisimaneq tunuliaqutaralugu aamma Nunatta sinnerani akuutissap taassuma atorneqarsimaneranut tunngasut misissorneqarnissaat Naalakkersuisuni kissaatigigipput, Anthon Frederiksen naggasiivoq.