Sanaartornermik suliffeqarfik: Inatsisinik unioqqutitseqqinnavianngilagut

Suliamilu pineqartumi aalajangiineq Nunatsinni sanaartornerup iluani unammilleqatigiinnermut sunniuteqassanersoq apeqqutaalerpoq.
Eqqartuussissuserisup ataatsip tamanna qularutigaa, eqqartuunneqartulli qularuteqanngillat:

- Aalajangiineq atuareerpara paasillugulu. Aalajangiinerlu tusaatissatut tiguarput. Suliaq BJ Entreprisep tulluusimaarutiginngilaa, unioqqutitsillutalu isumaqatigiissuteqaqqinnavianngilagut, BJ Entreprisep pisortaa John Kvistgaard Eliassen KNR-imut erseqqissaavoq.

Suliffeqarfiit pineqartut akiliisitaasussanngortinneqarnerisa saniatigut  pisortaasut tamarmik immikkut 25.000-it koruuninik akiliisitaasussanngortinneqarput.

- Sulariumannittussarsiuussinermi isumaqatigiissusiortarsimanerput inatsisinik unioqqutitsinerusoq paasigutsigu, taava soorunami taamaalioqqinnavianngilagut. Suliffeqarfiorusuppugummi tatigineqarsinnaasoq, B.J. Entreprisep pisortaa John Kvistgaard Eliassen oqarpoq.

Suliffeqarfiit akiliisussanngortitaasut ilaannit aamma taama isumaqartoqarpoq.

- Unammilleqatigiinnermut inatsimmik unioqqutitsisimanerput isumatusaarsimannginnerup kinguneraa, Permagreen Grønlandip pisortaa Preben Kold Larsen oqarpoq, suliffeqarfiillu pineqartut isumaqatigiissuteqarnerminni aningaasarsiorpallaarsimanngitsut erseqqissaatigalugu.

Eqqartuussivimmi aalajangiineq Kalaallit Nunaanni sanaartornermi unioqqutitsilluni isumaqatigiissusiortoqannginnerunissaanik nassataqassasoq, pisortat taakku marluk isumaqarput, pissusissamisornerusumillu unammilleqatigiittoqalernissaa aamma ilimagineqarluni.
Taamaattoq aningaasanik peqquserluttoqannginnissaa pillugu suliniaqatigiiffik Transparency Greenland suli qularisaqarpoq:

- Akiliisitsinerit annertussusaat tupigilaarpakka. Millionilikkaanik akiliisitaasussanngortoqarnissaa ilimgineqarsimagaluarpoq, 100.000-ilikkuutaaginnarnilli akiliisitaasoqartussanngorluni. Akiliisitsinerit annertunngillat, anusinngortitsinaviarnatillu, Anders Meilvang, aningaasanik peqquserluttoqannginnissaa pillugu sulianiaqatigiiffimmiit Transparency Greenlandimeersoq oqarpoq, pisortallu akuunerunissaat ujartorlgu:

- Pisortat matumani akuunerusuugaluarpata iluarnerussagaluarpoq. pisortammi namminneq sanaartortitsisorujussuupput, Anders Meilvang oqarpoq.

Pisortalli oqarput nakkutilliinissamut pissutissaqarluarlutik:

- Eqqartussinerup inernerata uppernarsisippaa Kalaallit Nunaanni sanaartorneq unammilleqatigiinnikkut pitsaavallaanngitsumik inissisimasoq, Unammilleqatigiinnermut Nakkutilliisoqarfiup ilimaginninnera uppernarsineqarpoq. Unammilleqatigiinnermut Nakkutilliisoqarfiup sanaartorneq taamaattumik nakkutigiussavaa, Unammilleqatigiinnermut Nakkutilliisoqarfiup aqutsisoqarfiani pisortap Nicolai Odgaard Jensenip oqaatigaa, nangillunilu:

- Suliariumannittussarsiuussinermi unioqqutitsilluni isumaqatigiissusiortarneq aningaasanik peqquserlunneruvoq sakkortooq. Taamaammat pingaaruteqarpoq suliffeqarfiit taamaaliortunik ilisimasaqartut ammasumik oqaaseqarsinnaanissaat. Peqquserluttoqannginnissaami taamaaliornikkut pinngitsoortissinnaaniassagatsigu, Nicolai Odgaard Jensen, Unammilleqatigiinnermut Nakkutilliisoqarfimmi aqutsisoqarfimmi pisortaq oqarpoq.

Kang-Total-Bygip eqqartuussivimmi aalajangiineq oqaaseqarfigerusunngikkallarpaa, ullulli 14-it qaangiutsinnagit aalajangiineq suliareqqitassanngortinneqassanersoq aalajangissavaat.