Sanaartorneq aallartissinnaanngorpoq
Sanaartornerup qangalili aallartinneqarsimannginnera arlalinnit siusinnerusukkut isornartorsiorneqartarpoq. Kinguartitsinermut pissutaavoq, Namminersorlutik Oqartussat sanaartornissamut neqeroorutit siulliit itigartimmatigik, tassa akikinnerusumik suliarineqarsinnaasutut isigigamikkik.
Maannalu sanaartornerit aallartinneqarsinnaalerneranni, ineqarnermut Naalakkersuisup Jens B. Frederiksenip itigartitsisimaneq nuannaarutigaa.
Tassami sanaartornermi kvadratmeterimut akit siullermik neqeroorutaasumi, taamani tamarmik kvadratmeterimut ataatsimut 20.000 koruunit sinnerlugit akeqaraluarmata.
Sisimiuni Qaqortumilu sanaartornermi kvadratmeterimut akigitinneqartussat 17.000 koruunit inorpaat, Ilulissanili qaffasinnerulaarluni 17.800 koruuneqassalluni.
2011-mi aggustimi ilaatigut Sulisitsisut Peqatigiiffiat Namminersorlutik Oqartussanut sakkortuumik isornartorsiuivoq, neqeroorutit kvadratmeterimut 20.000 koruuniusut itigartinneqarsimanerat isorineqarluni. Tassami Sulisitsisut Peqatigiiffiat isumaqarmat, kvadratmeterimut akit appasinnerusinnaanngitsut. Qujanartumilli pissutsit allaanerusinnaammata Jens B. Frederiksenip nunannaarutigaa.
- Kvadratmeterimut akiusut akuersaarsinnaasatsinnut appartinneqarsinnaanerannik isumaqarnerput allanngortissimannginnatsigu tulluusimaarutigaara. Uteriisernerup kingunersaanik maannakkut aningaasaliissutit atorlugit annertunerusumik sanaartorsinnaalerpugut, Jens B. Frederiksen oqarpoq.
Permagreen Sisimiuni Qaqortumilu sanaartortuuvoq. Sisimiuni inissiat quleriiaat pingasut katillugit 36-nik inissiartallit sananeqassallutik. Qaqortumi inissiaq quleriiaaq ataaseq aqqaneq marlunnik inissiartalik sananeqassalluni. Ilulissani Sannassisoq inissianik quleriiaanik marlunnik katillugit 24-inik inissiartalimmik sanasuussaaq.
Permagreenip pisortaata Preben Kold Larsenip oqaatigaa, Sisimiuni Qaqortumilu sanaartornerit juunip aallaqqaataani aallartinneqassasut.
Ilulissani Sannassisoq-mi pisortap Knud Andersenip oqaatigaa, taavani sanaartorneq maajip aallaqqaataani aallartinneqassasoq.
