Samoami pinaveersaartitsisoqaraluartoq mæsilinginik toqquteqartut amerliartortut
Mæslinginik nappaalasoqanerani nappaat tunillaassuuttuarsinnarpoq - inersimasut meeqqallu 70-t maannamut toqqutigigaat, Manerassuarmi qeqertarmi oqartussat taama nalunaaruteqarput.
Mæslinginik nappaalalersimasut allat 112-t nalunaaquttap-akunneri 24-t ingerlaneranni ataasinngornermi nalunaarsorneqarsimapput.
Mæslinginik nappaalanerit akiorniarlugit sapaatit akunnerata siuliani siamanngornermi tallimanngornermilu pinaveersaartitsisoqaraluarpoq, innuttaasullu 200.000-it missaanniittut akiuussutissinnissaat sulissutigineqarluni.
Pisortat allaffeqarfii matoqqatinneqarput, napparsimmavinnilu sulisut akiuussutissiinissamut suliaqartussanngorlugit sulisinneqarlutik. Inuimmi suli akiuussutissinneqarsimanngitsut ikiorserniarneqarput.
AAMMA ATUARUK Qeqertani sukannersumik aqutsineq atuutilerpoq toqusoqarnerata kingorna
Pinaveersaartitsineq iluatsitsiffiulluarpoq. Samoami naalakkersuisut oqarnerat naapertorlugu innuttaasut 90 procentii ornigullutik akiuussutissiisartunit nappaammut akiuussutissinneqarput.
Oktobarip qiteqqunnerani mæslinginik nappaalasoqalernerani innuttaasut 30 procentiisa missaannaat akiuussutissinneqarsimasuupput.
Akiuussutissaliinerup sunniunniartarnera ullut 14-it missaannik sivisussuseqartarpoq. Taamaattumik mæslingit atugaanerpaaffissartik angusimaneraat oqaatigineqarsinnaanngikkallarpoq.
Inuit 4700-ngajaat mæslinginik tunillatsisimasutut nalunaarsorneqarput. Inuit 229-t napparsimmavinni uninngapput. Taakkunani 16-t meeraapput peruluttut.
Meeqqat nappaammut tassunga qaninnerusarput. Nappaammik taassuminnga toqquteqartuni 70-iusuni 61-it meeraapput sisamanik ukiullit ukiukinnerilluunniit.
AAMMA ATUARUK Samoami mæslinginik nappaalasoqarnera meeraaqqat 50-ingajaat toqunerannik kinguneqartoq
Samoami peqqinnissakkut oqartussaqarfiit akiuussutissaliisarnernut akerliusartut akiuussutissinneqarsimasut ikippallaarnerannut akisussaaqataanerarpaat. Akiuussutissaliisarnernut akerliusorujussuit Samoami politiinit sapaatit akunnerata siuliani tigusarineqarput.
Manerassuarmi sumiiffinni allani soorlu Tongami, Fijimi USA-milu nunap ilaani Samoami innuttaasut akiuussutissinneqarsimasut amerlammata nappaatip tuniluunnissaa pinaveersaartilluarneqarnerusinnaasimavoq.
Nunarsuaq tamakkerlugu peqqinnissaq pillugu suliniaqatigiiffiup WHO-p kisitsisit saqqummiussai kingulliit naapertorlugit inuit mæslinginik toqquteqartut 2018-imi 142.000-upput.
