Samminneqqiineq: Hashi arsaarinnissutaasoq
Angallat tissiartaat 35 fodimik angissusilik Nanortallip kujataatungaani arfininngornermi ukamarusaarpoq. Angallammiippoq angut 62-inik ukiulik, danskiusoq, aamma angut kalaaleq 42-nik ukiulik.
Angallat sikorsuarnit ajornartorsiorpoq, alapernaarsuutillu "Ejnar Mikkelsen"-ip ikiorsereeraalu Kangilinnguani Sakkutooqarfiup politiit attaveqarfigai, ikiaroornartulerisartut ittuat Finn Jeppesen oqaluttuarpoq.
- Tissiartaammiittut oqaloqatigiumarpianngimmatik eqqumiigaat, pasitsaassaqarpullu. Taamaammat politiit angallataat Sisak qimminik ikiaroornartumik naamasinnaasumik marlunnik ilaasulerlugu taqqavunnartinneqarpoq.
Ikiaroornartoq hash annikitsunnguaq siullermik nassaarineqarpoq, tassa 38 grammi. Angutit marluk tigummigallagassanngortinneqarput, tissiartaat Nuummukaanneqarpoq misissuigineqarlualerlunilu. Ikaroornartumillu suli annertunerusumik nassaarfigineqarpoq. Angutit killisiorneqarnerani tamanna paasineqartoq, ikiaroornartulerisartut ittuata eqqaamavaa:
- Ikiaroornarumik naamasinnaasumik qimmiutillip aappaa killisiuinitsinni takkuppoq oqarlunilu angallammi iikkap aappaa peerlugu misissorsimagitsik, ikiaroornartorlu 8-9 kiilu nassaarisimallugu. Taamaammat isumaqatigiippugut angallat tamaat ingutserlugu misissuiviginiarlugu.
Iiltiisiviit arfinillit gassiisiviillu marluk taama oqimaatsiginerat tupigutsaapparput, Finn Jeppesen oqaluttuarpoq:
- Ventilit misilillugit ammarpavut, tusaasinnaavarpullu iltimik aniasoqartoq, taamaammat ikiaroornartumik taakkunaniittoqarnissaa ilimaginngikkaluarparput. Kisianni tassa oqimaappallaaqimmata pasitsappugut taakkunaniittoqartoq. Taava iltiisivik pilattorniarsarilerparput, paasivarpullu soorlu immikkut ittumik nateqartoq, toqqorsiffiulluarsinnaasumik, tassa ilti aniasinnaavoq, ikiaroornartorli naqqani toqqorneqarsimalluni.
Iltiisivinni taakkunani arfinilinni ikiaroornartoq 10-12 kiilu tippinut ermunneqarsimavoq. Gassiisivinnilu marlunni hashi 30 kiilu toqqorneqarsimavoq. Sulili annertunerusumik nassaarpugut.
- Kalunniisivimmi puussiami plastikkimi hashi 2 kiilu nassaaraarput, Finn Jeppesen oqarpoq.
Angut 62-inik ukiulik ukiuni arfineq-pingasuni isertitsivimmiittussanngorlugu oktobarip aallartilaarnerani pineqaatissinneqarpoq. 42-nik ukiulik ukiuni marlunni isertitsivimmiittussanngortinneqarluni.
Angutit marluk pinngitsuullutik eqqartuussivimmi oqareerput, kalaallillu 42-nik ikiullip imminut eqqartuussut Nunatta Eqqartuussivianut ingerlateqqippaa.
-
