Salmonyp Namminersorlutik Oqartussat naammaginartinngilai
Andreas Salmony misigisimavoq Namminersorlutik Oqartussat misissuisitsinermik avammut saqqummiussaat arlalitsigut kukkuneqartoq. Aammattaaq nalunaarusiap avammut saqqummiunneqannginnerani Salmonymut saqqummiuteqqaarneqarsimanngilaq.
-Eqqartuussissuserisup misissuinerata inernera tassanilu inerniliussat uannut saqqummiuteqqaarnagit, imaluunniit misissuisitsinerup avammut saqqummiunneqarnissaanik akuersiteqqaarnanga Namminersorlutik Oqartussat nalunaarusiamik avammut saqqummiussinerat tupaallaatigaara, Andreas Salmony tusagassiorfinnut nalunaaruteqarluni taama allappoq.
Eqqartuussissuserisup nalunaarusiornerata suliarineqarnerani Andreas Salmony peqataasimanngilaq. Salmonyp eqqartuussissuserisut suliami allagaatinik misissuinerannut peqataaniarani toqqarsimavaa.
-Atugassarititaasut pissutigalugit misissuisoqarneranut peqataanissara toqqissisimanartissimanngilara. Uangami isumaga malillugu nalunaarusiap arlaannaanulluunniit attuumassuteqanngitsumik suliarineqarnissaa qulakkeerneqarsimanngilaq. Misissuinerullu inernera takoreerlugu oqartariaqarpunga nalunaarusiaq suliamut peqataasup saqqummiussaatut, paasissutissanullu tunngavigineqartunut inerniliussaasunullu tunngatillugu kukkunernik imaqartoq, Salmony oqarpoq.
Eqqartuussissuserisut uparuagaasa ilaat tassaavoq Andreas Salmonyp qassinik ukioqarnera. Qassinimmi ukioqarnera inatsiseqarnermut pisortatut atorfinitsinneqarnerani Namminersorlutik Oqartussanit ilisimaneqareerpoq.
-Qassinik ukioqarnerma tunngavilersuutiginiarneqarnera isumaqataaffiginngilara, aamma suliatigut piginnaasakka apeqquserneqarnissaannut tunngavissaqanngilaq. Qanoq siunnersuisimanera aalajangiusimavara, aamma eqqortumik siunnersuisimallunga aalajangiusimavara. Suliatigut kattuffik ilaasortaaffigisara DJØF isumasioreerlugu Namminersorlutik Oqartussanit tunuarninnut tunngatillugu atugassarititaasut pillugit isumaqatigiissusioreerpunga suliarlu oqaaseqarfigeqqikkusunngilara, Salmony tusagassiorfinnut nalunaarutini taama naggaserpaa.
