Sakkutuut Kangerlussuarmi sungiusarnissartik taamaatikkaat
Amerikamiut sakkutuui 90-it danskillu sakkutuui 15-it nunatsinni ulluni qulini, aggustip 13-at aallarnerfigalugu, ajunaarnersuaqartillugu pilertortumik iliuuseqarnissamut sungiusarlutillu issittumi pissutsit ilinniarfigisussaagaluarpaat.
Amerikamiut sungiusarneq ingerlatsinissami piareersaanissamilu aqutsinerup aporfeqarnera patsisigalugu taamaatikkaat, attaveqaqatigiinnermut siunnersorti hjemmeværnimeersoq, Nanna Høyberg Pedersen, KNR-imut ilisimatitsivoq.
- Sakkutoorpassuit Kangerlussuarmut tikisinnissaannut timmisartut ikippallaarsimapput, Nanna Høyberg Pedersen oqarpoq.
AAMMA ATUARUK Ajunaarnersuaqarnerani iliuusissanik Kangerlussuarmi sungiusartoqalersoq
Sungiusassappatalu amerikamiut peqataanissaat pisariaqarpoq.
- Amerikamiut sapaatip akunnerani aggersumi ataatsimeeqatigineqassapput, ukioq mannalu sungiusarnissaq tassani ullulerneqassalluni, Nanna Høyberg Pedersen oqarpoq.
Sungiusarnermut atatillugu pisuusaartitsinermi innermik anitsisoqarnera pissutigalugu Nunarput Danmarkimit ikiorserneqarsinnaanngilaq, tamatumunngalu peqatigitillugu Kangerlussaq tassaarsuarmit eqqugaasimalluni.
Sakkutuut ajunaarnersuarmi inunnik ikiuiniarnermi pinngortitamilu ajunaarnersuaqarnerani iliuusissanik sungiusartinneqassapput, aammattaaq sungiusarneq Issittumi Sakkutooqarfiup nunatsinnilu oqartussat suleqatigiissinnissaat periarfissaassaaq, Hjemmeværnip attaveqaqatigiinnermut immikkoortortaqarfia allappoq.
