Ajunaarnersuaqarnerani iliuusissanik Kangerlussuarmi sungiusartoqalersoq
Hjemmeværni tusagassiorfinnut nalunaaruteqarluni taama allappoq.
Sungiusarneq taaguuteqarpoq Northern Resilience, danskillu amerikamiullu suleqatigiissutigalugu sungiusarnerissallugu, tamannalu Kangerlussuarmi ingerlanneqassaq.
Sungiusarnerup siunertaraa danskit amerikamiullu ajunaarnersuaqartillugu pilertortumik iliuuseqarnissamut sungiusarnissaat.
Sungiusarnermut atatillugu pisuusaartitsinermi innermik anitsisoqarnera pissutigalugu Nunarput Danmarkimit ikiorserneqarsinnaanngilaq, tamatumunngalu peqatigitillugu Kangerlussaq tassaarsuarmit eqqugaasimalluni.
Sakkutuut ajunaarnersuarmi inunnik ikiuiniarnermi pinngortitamilu ajunaarnersuaqarnerani iliuusissanik sungiusartinneqassapput, aammattaaq sakkutuut hjemmeværnimeersullu nunani tamalaani suleqatigiinnermik sungiussiniarnissaat kiisalu nunatsinni silap pissusianut nunattalu inissisimaneranut tunngatillugu ajornartorsiutaasinnaasut sungiusarfigissavaat.
Sungiusarneq Northern Resilience danskit sakkutuui nunani tamalaani suleqatigiinnikkut piginnaasaannik nukittorsaanissamik siunertaqarpoq. Aammattaaq sungiusarneq Issittumi Sakkutooqarfiup nunatsinnilu oqartussat suleqatigiissinnissaat periarfissaassaaq, Hjemmeværnip attaveqaqatigiinnermut immikkoortortaqarfia taama allappoq.
