Sakkutuut imarsiortut umiarsuaat sikumik aserorterutaapput

Qeqertarsuup Tunua maannakkut sikuusorsuuvoq. Sikooqimmat Aasiaat, Qasigiannguit Ilulissallunniit sapaatip akunnerata tulliani tikinissaat RAL´imit naatsorsuutigineqarsinnaanngilaq.

Nunatta kitaata qeqqani kujataanilu illoqarfiit nunaqarfiillu ilaat assartuutinik pilersorniarlugit sakkutuut imarsiortut umiarsuaat, assartuutinut sikusiutaapput. Knud Rasmussen Arina Arcticamut Sisimiunukartumut Maniitsumukartumullu sikusiutaalluni.

Nunaqarfiit Maniitsup Sisimiullu akornanniittut maannakkut tikinneqarsinnaanngitsut, Royal Arctic Line ilisimatitsivoq.

Sakkutuut imarsiortut umiarsuaat Hvidbjørnen sikumik kujataani aserorterutaavoq. RAL´p assartuutaasa ilaat Narsarsualiartoq aqqutissiuuteqqammerpaa – siku tamaaniittoq aserorterlugu. Assartuutit ilaat sapaatip akunnerani matumani Igalikulilialerpat aamma aqqutissiuuttussaavaa, sikumik aserorterilluni. Kujataani nunaqarfik maannakkut tikinneqarsinnaanngikkallartoq tassaavoq Qassiarsuk, RAL ilisimatitsivoq.

Kitaani tikinneqarsinnaanngikkallartut tassaapput Napasoq, Atammik, Kangaamiut, Qeqertarsuatsiaat, Kapisillit, Itilleq Sarfannguillu.