Sakkutuut Australiami ikuallarujussuarnermi qatsereqataatinneqartut
Australiami ikuallannerit eqqaanniittuni pissutsit arfininngornermi sakkortupput. Sakkutuut sillimmatit 3000-it oqartussanit ikiuiartoqquneqarput.
Arfininngormat silap issusaata Australiap kujasissortaani pinngortitami arlalinnik ikuallannernik qatseriniarnermut akornutaasorujussuunissaa naatsorsuutigineqareerpoq.
Inuit marluk ulloq kingulleq ajunaarput, taamaalillunilu ikuallannernut atatillugu ajunaartut maanna 23-upput.
* Australiami nuna 6 millionit hektarinik annertussusilik maanna ikuallattoqartarnerani ikuallappoq.
* Tamanna Amazonasimi orpippassuit siorna aggustimi ikuallannermit annertuneruvoq. Amazonasimi nuna 2,5 millionit hektarinik annertussusilik ikuallappoq.
* Inuit 23-t ajunaarput, angerlarsimaffiit 1500 aseruatiterlutik, uumasullu 500 millionit naalagaaffiit ilaanni New South Walesimiinnaq toqupput.
Paasissutissat nutaarsiassaqartitsivik AFP-meersuupput.
Sumiiffinni ikuallaffiulersinnaasuniittut qimagutissasut, nunap ilaani Victoriami ministeriuneq, Daniel Andrews oqarpoq.
- Ulloq qatserisartunut upalungaarsimasunullu ilungersorfiusorujussuuvoq. Victoriamiunut siunnersuinitsinnut tusarnaartunut sumiiffinniillu ikuallaffiusinnaasunit qimatsisunut tamanut qujarusuppunga, DR naapertorlugu Daniel Andrews oqarpoq.
AAMMA ATUARUK Australiami 2019-imi aatsaat taama kiatsigaaq
The Sunday Mornig Herald naapertorlugu sakkutuut sillimmatit 3000-it oqartussanit ikiuiartoqquneqarput.
Taakku naalagaaffiit ilaanni New South Walesimi Victoriamilu qatsereqataassasut illersornissamut ministeri Linda Reynolds Australiami arfininngornermi ualikkut oqarpoq.
- Sakkutuut sillimmatit nunatta oqaluttuarisaanerani aatsaat taama aggeqquneqarunarput, illersornissamut ministeri oqarpoq.
Arfininngormat silap issusia qatserinermut suli ajornarnerulertitsivoq.
40-t sinnerlugit kiappoq, sakkortuumillu anorlermat, New South Walesimi Victoriamilu ikuallannerit siaruariartupiloorpoq.