Sakkutuujusussaanermut misilitsinneq iluatsilluartoq

Sakkutuujusussaanermut Nuummi siullerpaamik misilitsittoqarpoq.

Silassorissuseq, tutsarissuseq, angissuseq oqimaassuseq ilaatigut paasiniarneqarput, naggasiutigalugulu peqqissuseq misilitsissutigineqarluni.

Misilitsinnerit iluatsilluarsimasut, nunatsinni Illersornissaqarfimmi akisussaasoq Dennis Rasmussen oqarpoq, 26-t ulluni siullerni marlunni misilitsikkiartoreersimasut nassuaalluni.

AAMMA ATUARUK Illersornissaqarfik nunatsinneersunit piumasoq

Amerlanerillu ulloq kingulleq naatinnagu misilitsereersimassasut, Dennis Rasmussen oqarpoq.

- Ullumikkullu ullormi kingullermi suli misilitsittaqattaartoqarluni. Taamaammat 30-t angujumaarlutigit naatsorsuutigaarput, Dennis Rasmussen oqarpoq, nangillunilu oqaluttuaralugu misilitsittut angutaannaanngitsut.

- Misilitsittut affaasa missaat arnaapput taamaanneralu nuannaarutigeqaarput. Tassami arnanik angutinillu pikkorissunik sulisussarserusukkatta, Dennis Rasmussen oqarpoq.

AAMMA ATUARUK Kalaallit inuusuttut sakkutuujusussaanermut nammineq nalunaarsinnaanngussapput

Piukkunnaateqaraanni illersornissaqarfimmi immikkoortut sisamat, tassalu nunami, imaani, timmisartortutut upalungaarsimasutulluunniit sakkutuujunissamut ullormi misilitsiffiusumi isumaqatigiissusiortoqarsinnaavoq.

Ullunilu misilitsiffiusuni kingulleq suli naammassinngitsoq aqqaneq-marlunnik isumaqatigiissusiortoqareersimasoq, Dennis Rasmussen oqaluttuarpoq.

- Tassa imaappoq misilitsikkiartortut affangajaat isumaqatigiissuteqarnissaminnut soqutiginnissimapput, Dennis Rasmussen oqarpoq

Sakkutuujussussaanermut aappaagu misilitsittoqaqqissaaq, tamatumuunalu Nuummiinnaanngitsoq. 

Tassami Qaqortumi, Sisimiuni, Nuummi Aasiannilu sakkutuujussussaatitaanermut naleqqunerlutit 18-it 30-llu akornanni ukioqaruit aappaagu misilitsissinnaavutit.