Tuluk sakkutuuiarneq 100-nik ukiulik saqqarmiulerneqartoq

Tuluk sakkutuuiarneq 100-nik ukiulik, Tom Moore, Tuluit Nunaanni coronavirusip ajornartoortitsinerani peqqinnissaqarfimmut million pundinik katersisimasoq tuluit kunngikkormiuisa nersuunaasiuttagaannik saqqarmiulerneqarpoq.

Tuluit Nunaanni nutaarsiassaqartitsiviit ilaat Sky News naapertorlugu tuluit ministeriunerat Boris Johnsen taama oqarpoq.

Tom Moore nersornaaserneqarnermi kingorna taamaalilluni Sir Tomimik taaguuteqalerpoq.

- Killitsittorujussuuvunga. Taama ataqqinartigisumik nersornaaserneqarnissara takorloorsimanngisaannarpara, Tom Moore Sky Newsimut oqarpoq.

- Ataqqinartorsuaq Dronningi, ministeriuneq, Tuluit Nunaannilu innuttaasut qutsavigaakka. Kiffartuussinera nangissavara, Tom Moore oqarpoq.

AAMMA ATUARUK 99-inik ukiulik pisuttuarluni millionerpassuarnik katersisoq

Tom Moorep saqqarmiulerneqarnissaanik innersuussisup, Boris Johnsonip, Moore naalagaaffimmi inuiaqatigiinnut sunniuteqarluartutut taavaa, Boris Johnsonillu innersuussinera Dronning Elizabethip akueraa.

Boris Johsenip oqarnera naapertorlugu, Tom Moore coronap ajornartoortitsilluni atugarliortitsinerani qiimmassaasuuvoq.

Tom Moore apriilip ulluisa 30-anni 100-liisoq sorsunnersuarmit kingullermit sakkutuuiarneruvoq.

Taanna aningaasanik coronavirusip tuniluunneranut akiuinermut atugassanik piffisami kingullermi katersuiniarpoq.