Sakkutooqarfinni kalaallinik inuttaqalernissaq oqallisaavoq
Folketingimut ilaasortaq Juliane Henningsen Danmarkimi nunanut allanut ministerimik aamma illersornissamut ministerimik Issittumi annaassiniartarneq Issittorlu pillugu suleriaasissamik ataatsimeeqateqarpoq:
- Nunatsinni sillimaniarnikkut aamma nakkutilliisoqarnikkut sulinermi nunaqavissut periarfissaqalissasut ilinniartitaallutik, aammalu tassuuna suleqataallutik, tassa umiarsuit nakkutilliisut kalaallinik inuttaqarnerulernissaat suliniutigineqarmat assut nuannaarutigaara, Juliane Henningsen oqarpoq.
Issittumi sakkutooqarfiup sumiinnissaata aalajangiiffigineqarnissaa, illersornissaq pillugu isumaqatigiissummi aamma aalajangiiffigineqartussaavoq. Tamannali ullumikkut oqaluuserineqanngitsoq Juliane Henningsenip oqaatigaa.
Nunarput pillugu ataatsimiititaliami ilaasortat, Savalimmiut pillugit ataatsimiititaliami ilaasortat aamma illersornissaq pillugu ataatsimiititaliami ilaasortat ataatsimiinnermi peqataapput.
Issittoq pillugu suleriaasissamik suliaqarneq pillugu paasissutissiineq oqaluuserineqartunut pingaarnernut ilaavoq.
Suleriaasissami saqqummiineq, qulequtakkaartumik pimmat, Juliane Henningsenip pitsaagivaa. Suleriaasissallu imarisassai ima taavai:
- Ilaatigut eqqaaneqarpoq issittoq tassaassasoq eqqisseqatigiiffiusoq aamma nunat akunnerminni isumaqatigiissuteqarlutik periusissanik aammalu sillimaniarnermut tunngasunik suleqatigiinnerulernissamik imaqarnissaa ilimasaarutigineqarpoq.
Issittumi periusissaq pilersaaarutinik tigussaasunik inerisitsiffiussasoq Juliane Henningsenip neriuutigaa.
- Issittumi periusissaq tassaanginnassanngitsoq oqaatsinik kusanartunik imalik, tassaassasorli toqqaannartumik issittumi ineriartornermut iluaqutaasinnaasumik tikkuussisoq, Juliane Henningsen oqarpoq.
Danmarkip, Savalimmiut Nunattalu Issittumi anguniagaat, Issittoq pillugu suleriaasissami aalajangersarneqassapput. Taannalu upernaap ingerlanerani naammassiniarneqarpoq.
Issittumi piareersimanissamut aalajangersakkap inatsisitigut pisussaaffiliisumik, Issittumi Siunnersuisoqatigiit maajimi Nunatsinni ataatsimiinneranni atsiorneqarnissaa pilersaarutaavoq.
